Visit:
న్యూఢిల్లీ : భద్రతా నిబంధనలను ఉల్లంఘించే స్లీపర్‌ కోచ్‌ బస్సులపై తక్షణమే చర్యలు తీసుకోవాలని జాతీయ మానవ హక్కుల కమిషన్‌ (ఎన్‌హెచ్‌ఆర్‌సీ) ఆదేశించింది. అన్ని రాష్ర్టాలు, కేంద్ర పాలిత ప్రాంతాల ప్రభుత్వ ప్రధాన కార్యదర్శులకు ఈ మేరకు శనివారం లేఖలు రాసింది. రాజస్థాన్‌లోని జైసల్మేర్‌-జోధ్‌పూర్‌ హైవేపై అక్టోబర్‌ 14న జరిగిన స్లీపర్‌ కోచ్‌ బస్‌ అగ్ని ప్రమాదంపై దాఖలైన ఫిర్యాదుపై ఈ విధంగా స్పందించింది. ప్రజా రవాణా బస్సుల డిజైన్‌లో తీవ్రమైన లోపాలు ఉన్నాయని, ఫలితంగా ప్రయాణికుల ప్రాణాలు ప్రమాదంలో పడుతున్నాయని ఫిర్యాదుదారు ఆరోపించారు.
డ్రైవర్‌ ఉండే క్యాబిన్‌, ప్రయాణికుల కంపార్ట్‌మెంట్‌ పూర్తిగా వేరుగా ఉంటున్నాయని, దీనివల్ల అత్యవసర సమయాల్లో సమాచారం ఇచ్చి, పుచ్చుకోవడానికి; సకాలంలో అగ్నిప్రమాదాలను గుర్తించడానికి అవకాశం ఉండటం లేదని తెలిపారు. ఇటీవల జరిగిన ప్రమాదాలను ప్రస్తావిస్తూ, ఈ దుర్ఘటనల్లో మరణాలను నిరోధించగలిగి ఉండేవారని చెప్పారు. ఈ నేపథ్యంలో కేంద్ర రోడ్డు రవాణా, హైవేల మంత్రిత్వ శాఖ కార్యదర్శికి, పుణెలోని కేంద్ర రోడ్డు రవాణా సంస్థ డైరెక్టర్‌కు కూడా ఎన్‌హెచ్‌ఆర్‌సీ నోటీసులిచ్చింది. ఈ ఆరోపణలపై రెండు వారాల్లోగా నివేదికను సమర్పించాలని ఆదేశించింది. దేశవ్యాప్తంగా భద్రతా ప్రమాణాలను పాటించేలా ఆదేశించాలని కోరింది. బాధితులకు, వారి కుటుంబాలకు నష్ట పరిహారం అందజేసే యంత్రాంగాన్ని ఏర్పాటు చేయాలని తెలిపింది.
