సురేంద్ర పెట్టుకున్న హౌజింగ్ లోన్ దరఖాస్తుకు ఓ ప్రముఖ బ్యాంక్ నుంచి అప్రూవల్ వచ్చింది.
ప్రైవేట్ కంపెనీలో జాబ్ చేస్తున్న సురేంద్ర.. రూ.50 లక్షల రుణాన్ని 15 ఏండ్ల కాలపరిమితితో తీసుకున్నాడు. పక్కా ఫైనాన్షియల్ ప్లాన్, మంచి నెట్వర్త్, ఆకర్షణీయమైన రుణ చరిత్ర సురేంద్రది.అయితే హౌజింగ్ లోన్ తీసుకునే టైంలో బ్యాంక్ సిబ్బంది తప్పనిసరి అనడంతో ఓ ఇన్సూరెన్స్ పాలసీని కూడా తీసుకోవాల్సి వచ్చింది. రూ.50 లక్షల రుణానికి అదనంగా మరో రూ.2 లక్షలను గృహ రుణ బీమా కోసం ఖర్చు చేశారు.
మీరు హౌజింగ్ లోన్ తీసుకునేందుకు సిద్ధమయ్యారు. నానా కష్టాలు పడితే చివరకు గృహ రుణం మంజూరైంది. అబ్బా.. టెన్షన్ తీరిపోయిందిరా.. ఇక ఆల్ హ్యాపీస్ అనుకుంటారు. తీరా సంతకాలు చేద్దామనుకుంటున్న తరుణంలో బ్యాంక్ ఏజెంట్ ఓ చిన్న మెలిక పెడతాడు. అదే ఇన్సూరెన్స్. ఈ పాలసీ తీసుకోవాల్సిందేనంటారు. చివరకు ఈ కొసరు పాలసీని వద్దంటే అసలుకే ఎసరొస్తుందనేంత బిల్డప్ ఇస్తారు. ఇంతకీ మనం ఏదైనా లోన్ తీసుకుంటున్నప్పుడు.. ముఖ్యంగా హౌజింగ్ లోన్కు వెళ్లినప్పుడు సదరు బ్యాంక్ చెప్పే ఇన్సూరెన్స్ తప్పక తీసుకోవాల్సిందేనా?.. లేకపోతే ఏమవుతుంది?.. రిజర్వుబ్యాంక్, ఐఆర్డీఏఐ నిబంధనలు ఏం చెప్తున్నాయ్.. తెలుసుకుందాం రండి.
లాభదాయకమేనా..
బ్యాంకులు, ఆర్థిక సంస్థలు.. తాము ఇచ్చిన రుణాన్ని తిరిగి పూర్తిగా రాబట్టుకోవడానికే చూస్తాయి. ఇందుకోసం ఎంత దూరమైనా వెళ్తాయి. నిజానికి హోం లోన్ అనేది ఓ దీర్ఘకాలిక రుణం. ఎక్కువగా 15-25 ఏండ్ల కాలపరిమితితోనే ఉంటుంది. ఈ సమయంలో రుణగ్రహీతకు ఏదైనా ఇబ్బంది రావచ్చు.. దురదృష్టవశాత్తు చనిపోవచ్చు.. మరే దుర్ఘటనలోనైనా అంగవైకల్యం సంభవించి ఉపాధి అవకాశాన్ని కోల్పోవచ్చు. ఇలాంటప్పుడు తమ రుణం ప్రమాదంలో పడకుండా ఉండేందుకు రుణదాతలు.. గృహ రుణంపై బీమా తీసుకోవాలని రుణగ్రహీతలపై ఒత్తిడి తెస్తారు. దీనివల్ల రుణం తీసుకున్నవాళ్లకు ఏదైనా జరిగితే.. ఆ భారం కుటుంబంపై పడకుండా సదరు బీమా సంస్థే మిగిలిన అప్పును మొత్తం చెల్లించేస్తుంది. కాబట్టి హౌజింగ్ లోన్ ఇన్సూరెన్స్ లాభదాయకమేనని చెప్పవచ్చు.
రెండింటికీ తేడా వుంది..
హౌజింగ్ ఇన్సూ రెన్స్, హౌజింగ్ లోన్ ఇన్సూరెన్స్ పేర్లు ఒకేలా కనిపించినా.. రెండింటి లక్ష్యం మాత్రం పూర్తిగా వేరు. ఏదైనా ప్రమాదంలో (వర్షాలు, విద్యుత్తు ప్రమాదం వంటివి) ఇంటికి డ్యామేజీ జరిగితే దాన్ని హౌజింగ్ ఇన్సూరెన్స్ కవర్ చేస్తుంది. కానీ హౌజింగ్ లోన్ ఇన్సూరెన్స్ మాత్రం.. మీరు తీసుకున్న రుణానికి బీమా కవరేజీని ఇస్తుంది. రుణదాతకు వర్తిస్తుంది. కుటుంబానికి ఇదో అండగా చెప్పుకోవచ్చు. సంపాదించేవారు దూరమై కష్టాల్లో ఉన్న కుటుంబం రోడ్డున పడకుండా కాపాడుతుంది.
చట్టాలు ఏం చెప్తున్నాయి..
కొన్ని ప్రభుత్వ బ్యాంకులు రుణగ్రహీతలను ఇబ్బందిపెట్టి బీమాను అంటగడ్తున్నాయంటూ సెంట్రల్ విజిలెన్స్ కమిషన్కు చాలా ఫిర్యాదులే అందాయి. దీంతో రిజర్వ్ బ్యాంక్, ఐఆర్డీఏఐ కూడా జోక్యం చేసుకోవాల్సిన పరిస్థితి వచ్చింది. అయితే హౌజింగ్ లోన్ ఇన్సూరెన్స్ తీసుకోకపోతే గృహ రుణం రాదేమోనన్న భయం వద్దు. ఆర్బీఐ, ఐఆర్డీఏఐ కూడా ఇదే చెప్తున్నాయి. గృహ రుణ బీమాను తీసుకోవడం, వద్దనుకోవడం పూర్తిగా రుణగ్రహీత ఇష్టప్రకారమే ఉంటుంది. రుణదాతలు కూడా ఈ విషయంలో రుణగ్రహీతలను ఏవిధంగానూ ఒత్తిడి చేయరాదు. కాబట్టి కుటుంబ పరిస్థితులు, భవిష్యత్తు, మీ ఆర్థిక స్థితిగతులు, రుణ భారాన్నిబట్టి హౌజింగ్ లోన్ ఇన్సూరెన్స్పై స్వేచ్ఛగా నిర్ణయం తీసుకోవచ్చు.
-నాగేంద్ర సాయి కుందవరం
మధ్యతరగతి వర్గాలకు ఊరట
సొంతిల్లు అనేది మధ్యతరగతి వర్గాలకు ఓ పెద్ద కల. అటువంటి కల నిజమైందన్న ఆనందం ఆవిరైపోకుండా కష్టాల్లో రక్షణనిచ్చేదే ఈ హౌజింగ్ లోన్ ఇన్సూరెన్స్. కాబట్టి ఎవరైనాసరే.. ముఖ్యంగా రూ.4-10 లక్షల వార్షికాదాయం కలిగిన రుణగ్రహీతలు గృహ రుణానికి వెళ్లినప్పుడు తప్పక హౌజింగ్ లోన్ ఇన్సూరెన్స్ను తీసుకోవడమే ఉత్తమం. రుణభారం పెద్ద ఎత్తున ఉంటుంది కనుక బీమాను తేలిగ్గా తీసుకోవద్దు. పైగా ఈ ఇన్సూరెన్స్కూ ఈఎంఐల రూపంలో చెల్లించవచ్చు. మీ హోం లోన్ ఈఎంఐలతోపాటే ఇన్సూరెన్స్ వాయిదాలు కలిసి ఉండేలా చేసుకోవచ్చు. నెలనెలా మీ బ్యాంక్ ఖాతా నుంచి సదరు మొత్తం కట్ అవుతుంది. అంతేగాక దీనివల్ల అదనంగా పెద్ద భారమేమీ ఉండదు.