దూసుకొచ్చే పాట బుల్లెట్‌

తమిళ హీరో శింబు బహుముఖ ప్రజ్ఞాశాలి. నటనతో పాటు గాయకుడిగా కూడా ఆయనకు మంచి పేరుంది. గతంలో ‘బాద్షా’ ‘పోటుగాడు’ చిత్రాల్లో ఆయన గొంతు సవరించారు. చాలా కాలం విరామం తర్వాత శింబు తెలుగు చిత్రం ‘ది వారియర్‌’లో ఓ పాట పాడారు. సంగీత దర్శకుడు దేవిశ్రీప్రసాద్‌తో ఉన్న ఆత్మీయ స్నేహం వల్ల శింబు పాటను ఆలపించడానికి ఒప్పుకున్నారని చిత్ర బృందం పేర్కొంది. త్వరలో ఈ పాటను విడుదల చేయబోతున్నారు. రామ్‌ కథానాయకుడిగా లింగుస్వామి దర్శకత్వంలో తెలుగు, తమిళ భాషల్లో ‘ది వారియర్‌’ చిత్రాన్ని తెరకెక్కిస్తున్నారు. శ్రీనివాసా చిట్టూరి నిర్మాత. జూలై 14న విడుదలకానుంది. నిర్మాత మాట్లాడుతూ ‘శింబు ఈ సినిమాలో ‘బుల్లెట్‌..’అనే పాటను పాడారు. మాస్‌ బీట్‌తో సాగే గీతమిది. దేవిశ్రీప్రసాద్‌ అద్భుతమైన బాణీకి.. శింబు గాత్రం తోడవడంతో పాట మరో స్థాయిలో తయారైంది. ప్రస్తుతం షూటింగ్‌ చివరి దశకు చేరుకుంది. ఈ సినిమాలో హీరో రామ్‌ పోలీసాఫీసర్‌గా కనిపిస్తారు’ అని చెప్పారు. కృతిశెట్టి కథానాయికగా, ఆది పినిశెట్టి ప్రతినాయకుడిగా నటిస్తున్న ఈ చిత్రానికి కెమెరా: సుజీత్‌ వాసుదేవ్‌, మాటలు: సాయిమాధవ్‌ బుర్రా, కథ, మాటలు, స్క్రీన్‌ప్లే, దర్శకత్వం: ఎన్‌.లింగుస్వామి.