సెల్ఫీ విత్‌ హెల్మెట్‌ డ్రైవ్‌ షురూ..

సిటీబ్యూరో, మార్చి 5(నమస్తే తెలంగాణ): రోడ్డు నిబంధనలు పాటించి.. ప్రమాదాల నివారణకు కృషి చేయాలని డ్రగ్స్‌ ఫ్రీ వరల్డ్‌ జూనియర్‌ అంబాసిడర్‌గా సేవలందిస్తున్న చిన్నారి తానియా బేగం పిలుపునిచ్చింది. అందులో భాగంగానే ‘సెల్ఫీ విత్‌ హెల్మెట్‌ పపా, సెల్ఫీ విత్‌ హెల్మెట్‌ మమ్మీ’ డ్రైవ్‌ను ప్రారంభించింది. హెల్మెట్‌ ధరించకపోవడంతో రోడ్డు ప్రమాదాల్లో మరణించిన వారి సంఖ్య పెరుగుతుందని తెలిపింది. ప్రతి ఒక్కరూ హెల్మెట్‌ ధరించి వాహనం నడపాలని సూచించింది. అందరూ హెల్మెట్‌ ధరించి సెల్ఫీ దిగి సోషల్‌ మీడియాలో పోస్ట్‌ చేయాలని పేర్కొంది. అలా, దిగిన వారు మరో ఐదుగురిని నామినేట్‌ చేస్తూ పోస్ట్‌ చేయాలని కోరింది. చిన్నారి తానియా బేగం శుక్రవారం అంబర్‌పేటలో  హెల్మెట్‌ ధరించి తన తల్లితో సెల్ఫీ దిగి ఐదుగురిని నామినేట్‌ చేసింది. కాగా, డ్రగ్స్‌ ఫ్రీ వరల్డ్‌ అనే అంతర్జాతీయ సంస్థ తానియాను భారత జూనియర్‌ అంబాసిడర్‌గా 2017 డిసెంబర్‌ 15న నియమించిన విషయం తెలిసిందే.