స్వర్గ రేఖ!.. సౌదీ అరేబియా ఎడారుల్లో మెట్రో నగరం

• ఒకే లైన్‌లో 170 కిలోమీటర్ల నిర్మాణం
• ప్రమాదాలు జరగకుండా భూగర్భంలో లేయర్లు
• 7.5 లక్షల కోట్లతో మూడేండ్లలో పూర్తి

ప్రపంచంలోనే అత్యాధునిక నగరానికి అంకురార్పణ జరిగింది. ఐదు దశాబ్దాలు నిర్విరామ కృషి చేసినా సాకారం కాని.. ఓ మహాద్భుత సిటీని మరో మూడేండ్లలో అందుబాటులోకి తీసుకువచ్చే ప్రయత్నాలు ముమ్మరమయ్యాయి. కాలుష్యమన్నదే లేని ఆ నగరమే ‘స్వర్గ రేఖ’ (లైన్‌ ఆఫ్‌ ప్యారడైజ్‌). ఎడారి దేశం సౌదీ అరేబియాలో ఈ నగర నిర్మాణం ఇటీవలే ప్రారంభమయ్యింది.

–నేషనల్‌ డెస్క్‌

ఏమిటీ స్వర్గ రేఖ?

వాయవ్య సౌదీ అరేబియాలోని టబుక్‌ ప్రావిన్సు నుంచి ఎర్ర సముద్రాన్ని కలుపుతూ.. ఎలాంటి వీధులు లేకుండా.. ఒకే సరళ రేఖ నిర్మాణంలో ఈ సిటీని నిర్మిస్తున్నారు. దీనినే ‘స్వర్గ రేఖ’గా పిలుస్తున్నారు. 170 కిలోమీటర్ల పొడవుతో ఉండే ఈ ‘స్వర్గ రేఖ’ను మూడు లేయర్లుగా నిర్మిస్తున్నారు.

ఎందుకు ఈ నగరం?

పర్యావరణ కాలుష్యాన్ని తగ్గించడం, రోడ్డు ప్రమాదాలను నివారించడం, వేగవంతమైన సేవలను అందించమే ఈ నగరం లక్ష్యం.

ఖర్చెంత?

రూ. 7.5 లక్షల కోట్లతో ఈ నగరాన్ని నిర్మిస్తున్నారు. 2024లో అందుబాటులోకి రానున్న ఈ నగరంలో 10 లక్షల మంది వరకు నివసించవచ్చు. ఈ నిర్మాణంతో 3.8 లక్షల మందికి ఉపాధి లభించనున్నది.

ఉపరితల నగరం: వాహనాలను అనుమతించబోరు. కేవలం ప్రజలు నడవడానికే అనుమతిస్తారు. సరళరేఖ మీద నాలుగు ప్రధాన ప్రాంతాల్లో పర్యావరణహిత రెసిడెన్షియల్‌ సముదాయాలను నిర్మిస్తారు. ఇందులోనే పాఠశాలలు, రెస్టారెంట్లు, దుకాణాలు కూడా ఉంటాయి. కేవలం ఐదు నిమిషాల నడకతో ఈ ప్రాంతాలను చేరుకోవచ్చు.

భూగర్భ నగరం-1: ఉపరితల నగరం కింద.. భూగర్భంలో దీన్ని నిర్మిస్తారు. ప్రభుత్వ, ప్రైవేట్‌ కార్యకలాపాలు, వైద్య సేవలు, డెలివరీ వస్తువులు ఈ ప్రాంతంలో అందుబాటులో ఉంటాయి.

భూగర్భ నగరం-2: భూగర్భ నగరం-1 కింద ఇది ఉంటుంది. ప్యాసింజర్‌, గూడ్స్‌ సేవలు ఇక్కడ అందుబాటులో ఉంటాయి. కృత్రిమ మేధ సాయంతో అల్ట్రా హైస్పీడ్‌తో ఇవి పనిచేస్తాయి.