ఆన్‌లైన్‌.. వలలో పడొద్దు!

పండుగలు, ప్రత్యేక సందర్భాలు వస్తున్నాయంటే చాలు.. ఈ-కామర్స్‌ వెబ్‌సైట్స్‌ డిస్కౌంట్లతో రెచ్చగొడతాయి. అన్ని వస్తువులపైనా బంపర్‌ ఆఫర్లంటూ ఊరిస్తాయి. వాటిలో మనకు ఏది అత్యంత అవసరమో, దానిని మాత్రమే ఎంచుకోవాలి.

• డెబిట్‌, క్రెడిట్‌ కార్డులకు ఓ పరిమితి నిర్ణయించుకోవాలి. దీనివల్ల వృథా ఖర్చు తగ్గుతుంది.
• నిత్యం ఆన్‌లైన్‌ షాపింగ్‌ సైట్‌లను, యాప్‌లను బ్రౌజ్‌ చేస్తున్నట్లయితే.. తక్షణం వాటిని అన్‌-ఇన్‌స్టాల్‌ చేయండి. కొంపలేం మునిగిపోవు.
• గతంలో మీరు కొన్న వస్తువుల్లో ఏది మీకు నిజంగా ఉపయోగపడుతున్నది, ఏది నిరుపయోగంగా ఉన్నది.. అన్న బేరీజు అవసరం. దీనివల్ల అనవసరమైన వాటి జోలికి అసలు వెళ్లరు.
• ఆ నెలకు సరిపడా కుటుంబ బడ్జెట్‌ను రూపొందించండి. దీనివల్ల బడ్జెట్‌కు లోబడి మాత్రమే షాపింగ్‌ చేస్తారు.
• తొందరపడి ఆన్‌లైన్‌లో ఏదైనా కొన్నా, ఉపయోగం లేదనిపిస్తే వెంటనే వాపసు చేయండి. మొహమాటం వద్దు.
• బ్రౌజ్‌ చేసేటప్పుడు, నచ్చిన వస్తువులను వెంటనే కొనకుండా.. ‘కార్ట్‌’లో యాడ్‌ చేయండి. తిరిగి కార్ట్‌లోకి వెళ్లి ఆర్డరు చేయండి. దీనివల్ల ఆలోచించుకునే సమయం దొరుకుతుంది.