ప్రపంచం మొత్తాన్ని వణికిస్తున్న ఒమిక్రాన్ వేరియంట్కు అంత భయపడాల్సిన అవసరం లేదని ఇటీవలే ఒమిక్రాన్ నుంచి కోలుకున్న పేషెంట్ చెప్పాడు. కర్ణాటకకు చెందిన సదరు వ్యక్తి సౌతాఫ్రికా నుంచి బెంగళూరు వచ్చాడు. ఇక్కడే అతనికి ఒమిక్రాన్ సోకినట్లు తెలిసింది.
వెంటనే అతన్ని ఆస్పత్రికి తరలించారు. అక్కడ చికిత్స అనంతరం తాజాగా 34 ఏళ్ల ఈ వ్యక్తి కోలుకున్నాడు. ఈ క్రమంలోనే తన అనుభవాలను వివరిస్తూ ఒక వీడియో సందేశం ఇచ్చాడు. తనకు ఒమిక్రాన్ సోకినా కూడా విపరీతమైన లక్షణాలేవీ కనిపించలేదని చెప్పాడు.
తనకు ఒమిక్రాన్ సోకినట్లు అధికారులు చెప్పిన తర్వాత కూడా ఆందోళన చెందకుండా, కరోనా నిబంధనలు పాటిస్తూ వచ్చానన్నాడు. ఒమిక్రాన్ లక్షణాలు చాలా తక్కువ మోతాదులోనే ఉన్నాయని, కాబట్టి ఈ వేరియంట్ను చూసి మరీ ఎక్కువగా భయపడాల్సిన అవసరం లేదని వివరించాడు.
తాను గతేడాది డెల్టా వేరియంట్ బారిన పడ్డానని, అప్పటితో పోల్చుకుంటే ఒమిక్రాన్ వల్ల తను పడ్డ ఇబ్బంది తక్కువే అని వివరించాడు. ఒమిక్రాన్ కన్నా తనను డెల్టా వేరియంటే అధికంగా బాధించిందన్నాడు. కర్ణాటకలో ఒమిక్రాన్ నుంచి కోలుకున్న తొలి వ్యక్తి ఈయనే కావడం విశేషం.