నాని పాన్‌ ఇండియా ప్రయత్నం

మన అగ్ర హీరోలంతా పాన్‌ ఇండియా బాట పట్టారు. తాజాగా వీరిలో చేరారు నాని. ఆయన కొత్త సినిమా ‘దసరా’ పాన్‌ ఇండియా చిత్రంగా తెరకెక్కుతున్నది. తెలుగు, తమిళం, కన్నడ, మలయాళంతో పాటు హిందీలో విడుదల కానుంది. ఈ సినిమాతో శ్రీకాంత్‌ ఓదెల దర్శకుడిగా పరిచయం అవుతున్నారు. కీర్తి సురేష్‌ నాయికగా నటిస్తున్నది. శ్రీ లక్ష్మీ వెంకటేశ్వర సినిమాస్‌ పతాకంపై సుధాకర్‌ చెరుకూరి నిర్మిస్తున్నారు. ఆదివారం సినిమా నుంచి స్పార్క్‌ ఆఫ్‌ దసరా పేరుతో వీడియోను విడుదల చేశారు. ఈ వీడియోలో లుంగీ కట్టుకుని నాని మాస్‌ లుక్‌లో కనిపిస్తున్నారు. ఆయన చేతిలో బీడి, నడుముకు లిక్కర్‌ బాటిల్స్‌ వేలాడుతున్నాయి. ఓపెన్‌ కాస్ట్‌ మైనింగ్‌ ప్రాంతంలో తన గ్యాంగ్‌తో నాని నడుస్తూ వచ్చిన ఈ వీడియో ఆసక్తికరంగా ఉంది. సింగరేణి ప్రాంతమైన గోదావరిఖని దగ్గర ఉన్న ఒక గ్రామంలో ‘దసరా’ కథ సాగనుంది. ఈ ఫ్యామిలీ డ్రామా చిత్రంలో మాస్‌ యాక్షన్‌ పాత్రలో నాని కనిపిస్తారు. ప్రస్తుతం రెగ్యులర్‌ చిత్రీకరణ జరుపుకుంటున్నదీ సినిమా. సముద్రఖని, సాయికుమార్‌, జరీనా వాహాబ్‌ తదితరులు ఇతర పాత్రల్లో నటిస్తున్న ఈ చిత్రానికి సంగీతం : సంతోష్‌ నారాయణన్‌, ఎడిటర్‌ : నవీన్‌ నూలి, సినిమాటోగ్రఫీ : సత్యన్‌ సూర్యన్‌ ఐఎస్‌సీ, ప్రొడక్షన్‌ డిజైనర్‌ : అవినాష్‌ కొల్ల.