Sunrisers Hyderabad | రైజర్స్‌ బొక్కబోర్లా.. ముంబైపై కాటేరమ్మ కొడుకుల ఫ్లాప్‌ షో

వరుస పరాభవాలు ఎదురవుతున్నా ఐపీఎల్‌-18లో సన్‌రైజర్స్‌ హైదరాబాద్‌ (ఎస్‌ఆర్‌హెచ్‌) ఆటతీరులో మార్పు రావడం లేదు. ప్రత్యర్థుల వేదికలతో పాటు సొంత మైదానంలోనూ సన్‌రైజర్స్‌ బొక్కబోర్లా పడుతున్నది. ప్లేఆఫ్స్‌ రేసులో నిలవాలంటే గెలుపు బాట పట్టాల్సిన మ్యాచ్‌లో హైదరాబాద్‌ మరోసారి బ్యాటింగ్‌ వైఫల్యంతో చేతులెత్తేసింది.

• హైదరాబాద్‌పై ముంబై ఘనవిజయం
• ఆదుకున్న క్లాసెన్‌
• హార్దిక్‌ సేనకు ఐదో విజయం

Sunrisers Hyderabad | హైదరాబాద్‌, ఆట ప్రతినిధి : వరుస పరాభవాలు ఎదురవుతున్నా ఐపీఎల్‌-18లో సన్‌రైజర్స్‌ హైదరాబాద్‌ (ఎస్‌ఆర్‌హెచ్‌) ఆటతీరులో మార్పు రావడం లేదు. ప్రత్యర్థుల వేదికలతో పాటు సొంత మైదానంలోనూ సన్‌రైజర్స్‌ బొక్కబోర్లా పడుతున్నది. ప్లేఆఫ్స్‌ రేసులో నిలవాలంటే గెలుపు బాట పట్టాల్సిన మ్యాచ్‌లో హైదరాబాద్‌ మరోసారి బ్యాటింగ్‌ వైఫల్యంతో చేతులెత్తేసింది. ఉప్పల్‌ వేదికగా సన్‌రైజర్స్‌తో జరిగిన మ్యాచ్‌లో ముంబై ఇండియన్స్‌.. ఆతిథ్య జట్టును 7వికెట్ల తేడాతో ఓడించింది. తద్వారా ఈ సీజన్‌లో ఐదో విజయాన్ని నమోదుచేసి ప్లేఆఫ్స్‌ రేసులో మరో ముందడుగు వేసింది. హెన్రిచ్‌ క్లాసెన్‌ (44 బంతుల్లో 71, 9 ఫోర్లు, 2 సిక్సర్లు), అభినవ్‌ మనోహర్‌ (43) ఆదుకోవడంతో మొదట బ్యాటింగ్‌ చేసిన ఎస్‌ఆర్‌హెచ్‌.. నిర్ణీత ఓవర్లలో 143/8 స్కోరు చేసింది. ట్రెంట్‌ బౌల్ట్‌ (4/26), దీపక్‌ చాహర్‌ (2/12) ఎస్‌ఆర్‌హెచ్‌ను కోలుకోలేని దెబ్బతీశారు. ఛేదనను ముంబై 15.4 ఓవర్లలోనే పూర్తిచేసింది. రోహిత్‌ శర్మ (46 బంతుల్లో 70, 8 ఫోర్లు, 3 సిక్సర్లు) మరో మ్యాచ్‌ విన్నింగ్‌ ఇన్నింగ్స్‌తో కదం తొక్కాడు. ఈ సీజన్‌లో ఆడిన 8 మ్యాచ్‌లలో ఎస్‌ఆర్‌హెచ్‌కు ఇది ఆరో ఓటమి. ప్రస్తుత పరిస్థితుల్లో హైదరాబాద్‌ ప్లేఆఫ్‌ ఆశలు అడుగంటినట్టే!

టాపార్డర్‌ టపటప

ఎస్‌ఆర్‌హెచ్‌ అభిమానులు కాటేరమ్మ కొడుకులుగా పిలుచుకునే సన్‌రైజర్స్‌ బ్యాటర్ల వైఫల్యం ఈ మ్యాచ్‌లోనూ కొనసాగింది. 2025లో ఘోరంగా విఫలమవుతున్న ట్రావిస్‌ హెడ్‌ అదే వైఫల్యాన్ని కొనసాగిస్తూ డకౌట్‌ అయ్యాడు. బౌల్ట్‌ రెండో ఓవర్లోనే హెడ్‌ను ఔట్‌ చేసి ఎస్‌ఆర్‌హెచ్‌ పతనానికి నాంది పలికాడు. అతడే తన మరుసటి ఓవర్లో అభిషేక్‌ (8)నూ పెవిలియన్‌కు పంపాడు. చాహర్‌ మూడో ఓవర్లో.. ఇషాన్‌ కిషన్‌ (1) అత్యుత్సాహానికి పోయి పెవిలియన్‌ చేరాడు. నితీశ్‌ రెడ్డి (2), అనికేత్‌ వర్మ (12) కూడా వారి బాటనే అనుసరించారు. 6 ఓవర్లలో సన్‌రైజర్స్‌ స్కోరు 24/4. 2025 సీజన్‌ పవర్‌ ప్లేలో ఇదే అత్యంత చెత్త స్కోరు.

క్లాసెన్‌ పోరాటం

35/5తో తీవ్ర కష్టాల్లో ఉన్న సన్‌రైజర్స్‌ ఆ మాత్రం స్కోరైనా చేయగలిగిందంటే అది క్లాసెన్‌ పోరాటం చలవే. క్రీజులో కుదురకున్నాక క్లాసెన్‌.. బ్యాట్‌కు పనిచెప్పాడు. విఘ్నేశ్‌ 10వ ఓవర్లో 6, 4, 4తో ఎస్‌ఆర్‌హెచ్‌ను 50 పరుగుల మార్కును దాటించాడు. హార్దిక్‌ ఓవర్లో మూడు బౌండరీలు దంచిన క్లాసెన్‌ 34 బంతుల్లో అర్ధ శతకాన్ని నమోదుచేశాడు. ఈ సీజన్‌లో అతడికిదే తొలి ఫిఫ్టీ. హెడ్‌ స్థానంలో ఇంప్యాక్ట్‌ ప్లేయర్‌గా వచ్చిన మనోహర్‌.. క్లాసెన్‌కు అండగా నిలవడంతో సన్‌రైజర్స్‌ గౌరవప్రదమైన స్కోరు సాధించింది.

ముంబై అలవోకగా..

సన్‌రైజర్స్‌ తడబడ్డ పిచ్‌పై ముంబై లక్ష్యాన్ని సాఫీగా దంచేసింది. బౌండరీతో చేధన ప్రారంభించిన రికెల్టన్‌ (11) త్వరగానే పెవిలియన్‌ చేరినా చెన్నై మ్యాచ్‌తో ఫామ్‌లోకి వచ్చిన ముంబైచా రాజా (రోహిత్‌).. అదే జోరును కొనసాగించాడు. కమిన్స్‌ 3వ ఓవర్లో 6, 4 బాదిన హిట్‌మ్యాన్‌.. ఉనద్కత్‌ బౌలింగ్‌లోనూ 4, 6 దంచాడు. మరో ఎండ్‌లో విల్‌ జాక్స్‌ (22) రోహిత్‌కు అండగా నిలవడంతో ముంబై స్వల్ప లక్ష్యాన్ని వేగంగా కరిగించింది. కమిన్స్‌ బౌలింగ్లో బౌండరీతో 35 బంతుల్లో రోహిత్‌ ఫిఫ్టీ పూర్తయింది. పదో ఓవర్లో అన్సారీ.. జాక్స్‌ను ఔట్‌ చేసినా ఆ ప్రభావం ముంబైపై పడలేదు. సూర్యకుమార్‌ (40) సాయంతో రోహిత్‌.. ముంబై విజయాన్ని ఖాయం చేశాడు. విజయానికి 13 పరుగుల దూరంలో రోహిత్‌ ఔటైనా సూర్య, తిలక్‌ లాంఛనాన్ని పూర్తిచేశారు.

స్టేడియం హాజరు: 36,171

సంక్షిప్త స్కోర్లు :

హైదరాబాద్‌ : 20 ఓవర్లలో 143/8 (క్లాసెన్‌ 71, అభినవ్‌ 43, బౌల్ట్‌ 4/26, చాహర్‌ 2/12)

ముంబై : 15.4 ఓవర్లలో 146/3 (రోహిత్‌ 70, సూర్య 40, ఉనద్కత్‌ 1/25, అన్సారీ 1/36)

నివాళి: మ్యాచ్‌కు ముందు పహల్గాం ఉగ్రదాడిలో కన్నుమూసినవారికి బీసీసీఐ ఘనంగా నివాళి అర్పించింది. ఉగ్రదాడిని ఇరు జట్ల కెప్టెన్లు ముక్తకంఠంతో ఖండించగా మ్యాచ్‌లో ఆటగాళ్లు, అంపైర్లతో పాటు కామెంటేటర్లూ నల్లబ్యాడ్జ్‌లు ధరించి బాధిత కుటుంబాలకు సంఘీభావం ప్రకటించారు. ఆట ఆరంభానికి ముందు స్టేడియంలో ప్రేక్షకులతో పాటు అందరూ ఒక నిమిషం పాటు మౌనం పాటించారు. ఈ మ్యాచ్‌లో చీర్‌ లీడర్స్‌కు, డీజేలకు అనుమతినివ్వలేదు.