Donald Trump | దూసుకుపోతున్న డొనాల్డ్ ట్రంప్.. మరో మూడు రాష్ట్రాల్లో నిక్కీ హేలీపై ఘన విజయం

రిపబ్లికన్‌ పార్టీ తరఫున అమెరికా అధ్యక్ష ఎన్నికల రేసులో డొనాల్డ్‌ ట్రంప్‌ (Donald Trump) దూసుకుపోతున్నారు. ఇప్పటికే తన ప్రత్యర్థి, భారత సంతతికి చెందిన నిక్కీ హేలీని (Nikki Haley) ఆమె సొంతరాష్ట్రంలోనే ఓడించి ఊపుమీదున్న ట్రంప్‌.. మరోసారి విజయాల పరంపరను కొనసాగించారు.

వాషింగ్టన్‌: రిపబ్లికన్‌ పార్టీ తరఫున అమెరికా అధ్యక్ష ఎన్నికల రేసులో డొనాల్డ్‌ ట్రంప్‌ (Donald Trump) దూసుకుపోతున్నారు. ఇప్పటికే తన ప్రత్యర్థి, భారత సంతతికి చెందిన నిక్కీ హేలీని (Nikki Haley) ఆమె సొంతరాష్ట్రంలోనే ఓడించి ఊపుమీదున్న ట్రంప్‌.. మరోసారి విజయాల పరంపరను కొనసాగించారు. ప్రైమరీ ఎన్నికల్లో భాగంగా మిచిగాన్, ఇడాహో, మిస్సౌరీ రాష్ట్రాల్లో శనివారం ఓటింగ్‌ జరిగింది. వాటిల్లోనూ హేలీపై ఆయన పైచేయి సాధించారు. ట్రంప్‌ దాదాపు 98 శాతం అంటే 1575 ఓట్లతో గెలుపొందగా, నిక్కీకి 36 ఓట్లు మాత్రమే వచ్చాయి.

ఇప్పటివరకు అయోవా, న్యూ హాంప్‌షైర్, నెవాడా, యూఎస్ వర్జిన్ ఐలాండ్స్, మిచిగాన్, మిస్సౌరీ, ఇడాహో, సౌత్ కరోలినా, నార్త్ కరోలినాలో విజయాలతో అధ్యక్ష అభ్యర్థిత్వ రేసులో ట్రంప్ ముందంజలో ఉన్నారు. వచ్చే మంగళవారం మరో 15 రాష్ట్రాల్లో ఎన్నికలు జరుగనున్నాయి. వీటిలో మెజార్టీ స్థానాల్లో గెలిచినట్లయితే.. వచ్చే జులైలో ఆయనను రిపబ్లికన్‌ పార్టీ అధ్యక్ష అభ్యర్థిగా అధికారికంగా ప్రకటించనున్నారు. దీంతో ఈ ఏడాది నవంబర్‌లో జరుగనున్న అధ్యక్ష ఎన్నికల్లో ట్రంప్, ప్రెసిడెంట్ జో బైడెన్(Joe Biden) మధ్య గట్టి పోటీ ఉండనుంది.