False Positivity | రాధిక జీవితం సాఫీగా సాగిపోతున్నది. మంచి ఉద్యోగం. మంచి భర్త. సువిశాలమైన ఇల్లు. పిల్లలిద్దర్నీ ఇంటర్నేషనల్ స్కూల్లో చదివిస్తున్నది. ఇంతలోనే ఓ అనూహ్య పరిణామం. కోరిక తీర్చలేదన్న కారణంతో బాస్ ఆమె మీద అసమర్థురాలనే ముద్ర వేశాడు. చేయని తప్పులు నెత్తిన మోపాడు. దీంతో ఉద్యోగం పోయింది. సరిగ్గా అదే సమయంలో భర్త వ్యాపారం దివాలా తీసింది. రోజువారీ ఖర్చులకు కూడా తడుముకోవాల్సిన పరిస్థితి. ఆ బాధల్ని పంచుకునేందుకు బాల్య స్నేహితురాలికి ఫోన్ చేసింది రాధిక. సంభాషణలో ఓదార్పు లభించలేదు సరికదా… ‘దిగాలుపడి ఎలాంటి ప్రయోజనం లేదు. నీ మొండితనం కారణంగా లక్షణమైన ఉద్యోగం కోల్పోయావు.
పిల్లల భవిష్యత్తునూ దెబ్బతీస్తున్నావు. ఇప్పటికైనా మారు. ఎవరి ఓదార్పు కోసమో ఎదురుచూడటం మూర్ఖత్వం అవుతుంది’ అంటూ అటువైపు నుంచి కటువైన మాటలు వినిపించాయి. తాను ఎలాంటి సాయమూ చేయలేనంటూ పరోక్షమైన సంకేతాలు అందాయి. ఇవి రాధికకు ఊరటనివ్వలేదు సరికదా! ఇక నుంచి ఎవరి ముందూ బాధలు చెప్పుకోకూడదు అనిపించిందామెకు. నిజమే, ప్రతి సందర్భంలోనూ వ్యక్తిత్వ వికాస సూక్తులు పనిచేయవు. కొన్నిసార్లు ఆ మాటలు వికటిస్తాయి కూడా. దీన్నే ‘టాక్సిక్ పాజిటివిటీ’ లేదా ‘ఫాల్స్ పాజిటివిటీ’ అంటారు నిపుణులు. ఆత్మీయులు కష్టంలో ఉన్నప్పుడు అండగా ఉన్నామనే భరోసా కల్పించాలి. వ్యక్తిత్వ వికాస ఉపన్యాసాలతో ఊదరగొట్టడం సరికాదు.