పక్షం దాటినా ఫైనల్‌ బిల్లు రాలే!

రాష్ట్రవ్యాప్తంగా ఇందిరమ్మ ఇండ్లకు సంబంధించి పెండింగ్‌లో ఉన్న ఫైనల్‌ బిల్లులన్నింటినీ పది రోజుల్లో క్లియర్‌ చేస్తాం. ఎలాంటి లంచాలకూ తావులేకుండా లబ్ధిదారుల ఖాతాల్లో నగదు జమ చేసే బాధ్యత ప్రభుత్వానిదే’ ఇది ఖమ్మం జిల్లా నేలకొండలపల్లిలో అక్టోబర్‌ 26న రెవన్యూ, గృహ నిర్మాణ శాఖల మంత్రి పొంగులేటి శ్రీనివాస్‌రెడ్డి చెప్పిన మాట.

• మంత్రి పొంగులేటి హామీ బుట్టదాఖలు l నిరీక్షిస్తున్న ఇందిరమ్మ ఇండ్ల లబ్ధిదారులు

• పూర్తయిన ఇండ్లు 2.25 లక్షలు చెల్లించింది 15,475 మందికే

• కేంద్రం ఇవ్వడంలేదని సాకులు

హైదరాబాద్‌, నవంబర్‌ 12 (నమస్తే తెలంగాణ): ‘రాష్ట్రవ్యాప్తంగా ఇందిరమ్మ ఇండ్లకు సంబంధించి పెండింగ్‌లో ఉన్న ఫైనల్‌ బిల్లులన్నింటినీ పది రోజుల్లో క్లియర్‌ చేస్తాం. ఎలాంటి లంచాలకూ తావులేకుండా లబ్ధిదారుల ఖాతాల్లో నగదు జమ చేసే బాధ్యత ప్రభుత్వానిదే’ ఇది ఖమ్మం జిల్లా నేలకొండలపల్లిలో అక్టోబర్‌ 26న రెవన్యూ, గృహ నిర్మాణ శాఖల మంత్రి పొంగులేటి శ్రీనివాస్‌రెడ్డి చెప్పిన మాట. ఇందిరమ్మ ఇండ్ల లబ్ధిదారులందరికీ పెండింగ్‌లో ఉన్న చివరి బిల్లును పది రోజుల్లో చెల్లిస్తామన్న మంత్రి పొంగులేటి హామీ బుట్టదాఖలైంది. 15 రోజులు దాటినా లబ్ధిదారుల ఖాతాల్లో చివరి బిల్లు రూ.లక్ష జమ కాలేదు. ఇందిరమ్మ ఇండ్లలో దీపావళి పండుగ చేసుకోవాలని, పటాకులు కాల్చుకోవాలని చెప్పిన ప్రభుత్వం ఆఖరి విడత నగదు అందించడంలో నిర్లక్ష్యం చేస్తున్నది. అప్పులు తెచ్చి ఇండ్లు కట్టుకున్న లబ్ధిదారులు బిల్లుల కోసం నెలల తరబడి నిరీక్షించాల్సి వస్తున్నది.

కేంద్రంపై నెపం

గ్రామీణ ప్రాంతాల్లో నిర్మించే ఇండ్లకు కేంద్ర ప్రభుత్వం ప్రధానమంత్రి అవాస్‌ యోజన గ్రామీణ్‌ స్కీమ్‌ కింద 60% అంటే రూ.3 లక్షల వరకు చెల్లిస్తున్నది. ఈ లెక్కన రాష్ట్ర ప్రభుత్వం రూ.2 లక్షలే అందిస్తున్నది. కేంద్రం నిధుల విడుదల్లో జాప్యం చేస్తున్నదని చెబుతూ చివరి బిల్లు చెల్లింపులో రాష్ట్ర ప్రభుత్వం తాత్సారం చేస్తున్నదని లబ్ధిదారులు ఆరోపిస్తున్నారు. బిల్లుల చెల్లింపులో మాత్రం తీవ్ర జాప్యం జరుగుతున్నది.

లబ్ధిదారులపై ఆర్థికభారం

ప్రభుత్వం ఇచ్చే నగదుతో 30% ఇంటి నిర్మాణం కూడా పూర్తికాదని లబ్ధిదారులు చెప్తున్నారు. మిగిలిన 70% తామే భరించాల్సి వస్తున్నదని వివరిస్తున్నారు. రూ.పది లక్షల దాకా అప్పు చేయాల్సి వచ్చిందని అంటున్నారు. ప్రభుత్వం చివరి బిల్లు కింద రూ.లక్ష ఇవ్వకపోవడంతో తీవ్ర ఇబ్బందులు పడాల్సి వస్తున్నదని ఆవేదన వ్యక్తంచేస్తున్నారు. దీంతో ప్రభుత్వం ఇచ్చు చివరి బిల్లు మిత్తికే సరిపోతున్నదని వాపోతున్నారు.

తొమ్మిది నెలలుగా నిరీక్షణ

రాష్ట్రవ్యాప్తంగా ఇందిరమ్మ ఇండ్ల లబ్ధిదారులు చివరి బిల్లు కోసం తొమ్మిది నెలలుగా ఎదురుచూస్తున్నారు. గృహప్రవేశం చేసినవారు రూ.లక్ష కోసం నిరీక్షిస్తున్నారు. నగదు జమకాకపోవడంతో అధికారుల చుట్టూ చెప్పులరిగేలా తిరుగుతున్నారు. రెండు విడతల్లో ఇంటి స్థలం కలిగిన అర్హులైనవారికి తొమ్మిది లక్షల గృహాలు నిర్మించి ఇవ్వాలని సంకల్పించారు. ఇందుకోసం 2026-27 బడ్జెట్‌లో రూ.5,500 కోట్లు కేటాయించారు. ఇందులో ఎనిమిది లక్షల ఇండ్లను మంజూరు చేశామని మంత్రి పొంగులేటి ఇటీవల ప్రకటించారు. రెండు విడతల్లో కలిపి 2.25 లక్షల ఇండ్ల నిర్మాణం పూర్తయిందని వెల్లడించారు.

2026 మార్చిలో 2,764 మంది ఖాతాల్లో రూ.28.5 కోట్ల బిల్లులు జమ చేశారు. ఆగస్టులో 15,475 మందికి చివరి బిల్లు కింద రూ.185 కోట్లు చెల్లించారు. మంత్రి, అధికారులు చెప్పిన లెక్కల ప్రకారం 2.06 లక్షల మందికి ఫైనల్‌ బిల్లు అందలేదని తెలుస్తున్నది. వీరికి రూ.2,600 కోట్లు చెల్లించాల్సి ఉన్నదని సమాచారం.