Visit:
Chiru-Bobby | టాలీవుడ్లో ప్రస్తుతం అత్యంత ఆసక్తిగా ఎదురుచూస్తున్న ప్రాజెక్ట్లలో మెగాస్టార్ చిరంజీవి-దర్శకుడు కేఎస్ రవీంద్ర కాంబినేషన్లో రాబోతున్న సినిమా ఒకటి. ‘వాల్తేరు వీరయ్య’ వంటి బ్లాక్బస్టర్ విజయానంతరం వీరిద్దరూ మరోసారి చేతులు కలపడంతో ఈ చిత్రంపై ఇప్పటికే భారీ అంచనాలు నెలకొన్నాయి. తాజాగా ఈ సినిమాకు సంబంధించి సోషల్ మీడియాలో ఓ ఆసక్తికరమైన వార్త వైరల్గా మారింది. సినీ వర్గాల సమాచారం ప్రకారం, చిరంజీవి కెరీర్లో 158వ చిత్రంగా రూపొందుతున్న ఈ సినిమాలో క్లైమాక్స్కు ప్రత్యేక ప్రాధాన్యత ఉండబోతుందట. ముఖ్యంగా చివరి భాగంలో ఓ కీలక గెస్ట్ అప్పియరెన్స్ను దర్శకుడు ప్లాన్ చేశాడని తెలుస్తోంది. ఆ పాత్రలో హీరో నారా రోహిత్ కనిపించే అవకాశాలు ఉన్నాయనే ప్రచారం ప్రస్తుతం ఇండస్ట్రీ వర్గాల్లో హాట్ టాపిక్గా మారింది. అయితే దీనిపై చిత్రబృందం నుంచి ఇంకా ఎలాంటి అధికారిక ప్రకటన రాలేదు.
ఇక ఈ సినిమాలో మెగాస్టార్ పాత్ర చాలా విభిన్నంగా ఉండబోతుందనే వార్తలు కూడా అభిమానుల్లో ఆసక్తిని పెంచుతున్నాయి. ముఖ్యంగా సెకండ్ హాఫ్లో వచ్చే ఫ్లాష్బ్యాక్ ఎపిసోడ్ కోసం చిరంజీవి పూర్తిగా కొత్త లుక్లో కనిపించనున్నారని సమాచారం. గత చిత్రాల్లో చూడని విధంగా ఆయన పాత్రలో పలు షేడ్స్, ఎమోషనల్ వేరియేషన్స్ ఉండనున్నాయని తెలుస్తోంది. దీంతో మెగాస్టార్ అభిమానులు ఈ చిత్రంపై మరింత ఆసక్తి కనబరుస్తున్నారు. దర్శకుడు బాబీ ఈసారి పూర్తిస్థాయి ఫ్యామిలీ ఎంటర్టైనర్ను సిద్ధం చేస్తున్నట్లు టాక్ వినిపిస్తోంది. కమర్షియల్ అంశాలతో పాటు కుటుంబ బంధాలు, భావోద్వేగాలకు పెద్దపీట వేస్తూ కథను రూపొందించారని తెలుస్తోంది. ముఖ్యంగా చిరంజీవిని కొత్త కోణంలో చూపించాలనే ఉద్దేశంతోనే ఈ కథను ప్రత్యేకంగా డిజైన్ చేసినట్లు సినీ వర్గాలు చెబుతున్నాయి.
అంతేకాకుండా కథలో భావోద్వేగాలు, యాక్షన్, వినోదం సమపాళ్లలో ఉండేలా దర్శకుడు ప్రత్యేక శ్రద్ధ తీసుకుంటున్నాడట. మెగాస్టార్ ఇమేజ్కు తగ్గట్టుగానే కాకుండా, ప్రేక్షకులు కొత్తగా ఫీల్ అయ్యేలా పాత్రను తీర్చిదిద్దుతున్నారని సమాచారం. అందుకే ఈ ప్రాజెక్ట్పై ఇప్పటికే భారీ హైప్ ఏర్పడింది. ఈ చిత్రాన్ని ప్రముఖ నిర్మాణ సంస్థ కేవీఎన్ ప్రొడక్షన్ బ్యానర్పై నిర్మాతలు వెంకట్ కె నారాయణ, లోహిత్ అత్యంత భారీ బడ్జెట్తో నిర్మిస్తున్నారు. సాంకేతిక విలువలు, నిర్మాణ ప్రమాణాల విషయంలో ఎక్కడా రాజీ పడకుండా ఈ చిత్రాన్ని రూపొందించనున్నట్లు తెలుస్తోంది. కాగా, గతంలో చిరంజీవి-బాబీ కాంబినేషన్లో వచ్చిన వాల్తేరు వీరయ్య బాక్సాఫీస్ వద్ద ఘన విజయం సాధించింది. ఆ సినిమా కమర్షియల్గా భారీ వసూళ్లు సాధించడంతో పాటు అభిమానులను విపరీతంగా ఆకట్టుకుంది. ఇప్పుడు అదే కాంబినేషన్లో వస్తున్న ఈ కొత్త చిత్రం కూడా మరోసారి బాక్సాఫీస్ను షేక్ చేస్తుందా అనే ఆసక్తి సినీ ప్రేక్షకుల్లో నెలకొంది.
