వైట్‌ నాయిస్‌

‘స్పేస్‌' అంటే అంతరిక్షమనే అనుకున్నాను ఇన్నాళ్లూ!

‘స్పేస్‌’ అంటే అంతరిక్షమనే
అనుకున్నాను ఇన్నాళ్లూ!
పర్సనల్‌ స్పేస్‌ కావాలంటూ
నువ్వు అల్టిమేటం ఇచ్చేసాక
‘గాడ్జెట్‌’ల కళ్లతో లోకాన్ని చూసే నీతో యంత్రాల గురించి తప్ప
మమతల మంత్రాల గురించి
ఏమని చెప్పను?
నీ మాటనే సప్తపదిగా భావించి
నీతో నడిచొస్తున్నప్పుడు
ఊరి గుండెను కూడా వెంట తెచ్చానేమో
నాకు నీ తీరు
అర్థంకాని పజిల్‌ లాగే ఉంది!
కుటుంబాలంటేనే కొన్ని త్యాగాలు..
మరిన్ని ప్రేమలు
సహజీవనం అంటేనే నమ్మకం.. విశ్వాసం
మరణంలో సైతం తోడు వచ్చే
జ్ఞాపకాలే కదా స్నేహాలు…
నీళ్లంటే జీవగంజి
ఆడాళ్లంటే జీవ నాడి
ఆడదంటే ఇవ్వటమే తెలిసిన
అరుదైన జాతి!
ఇన్నేండ్ల తర్వాత
బంధాలన్నీ బంధనాలేనని
సెల్ఫ్‌ పార్టనర్‌గా ఉంటేనే
జీవితంలో స్వేచ్ఛ ఉంటుందని
కొత్త ప్రవచనాలు మొదలెట్టేశావ్‌
అనిశ్చితి పెంచే దృశ్యమాధ్యమాలు
అన్నిటి మధ్యా అశాంతి జీవితాలు
ఎన్నెన్ని చూసుంటాం..!
సహచరుడా!
వినోదమైనా, వేదనైనా పంచుకోవటానికి
ఓ మనిషి కావాలి!
మిత్రుడా…
‘వైట్‌ నాయిస్‌’ని ఇంకా నా మనసుకు
వినిపించాలని ప్రయత్నించకు
ఉమ్మనీటిలో ఉన్నప్పుడు పొందిన భద్రతని
ఆ సమైక్య ఫ్రీక్వెన్సీల సంగీతంతో
భ్రమింప చేయకు
జగతిలోకి కొత్త తరాన్ని పుట్టించిన దాన్ని
ప్రసవ వేదననే కోరి వరించినదాన్ని
నా కోసం నేను
జీవితాన్ని కొత్తగా మొదలెడతాను
ఇక…
నా ‘స్పేస్‌’ని నేను సృష్టించుకుంటాను..!

అయినంపూడి శ్రీలక్ష్మీ
99899 28562