నా మాటే శాసనం

‘ఒక మాట నువ్వంటే అది శబ్దం. అదే మాట నేనంటే శాసనం. దైవ శాసనం అని చెబుతున్న అఖండ కథేమిటో తెలియాలంటే మా సినిమా చూడాల్సిందే’ అన్నారు బోయపాటి శ్రీను. ఆయన దర్శకత్వంలో బాలకృష్ణ కథానాయకుడిగా నటిస్తున్న చిత్రం ‘అఖండ’. ద్వారకా క్రియేషన్స్‌ పతాకంపై మిర్యాల రవీందర్‌రెడ్డి నిర్మిస్తున్నారు. ట్రైలర్‌ను ఆదివారం చిత్రబృందం విడుదలచేసింది. ఈ ట్రైలర్‌లో బాలకృష్ణ అఘోరాగా, సాధారణ వ్యక్తిగా రెండు భిన్న పార్శాల్లో కనిపిస్తున్నారు. ‘విధికి, విధాతకు, విశ్వానికి సవాళ్లు విసరకూడదు’ అనే డైలాగ్‌తో ట్రైలర్‌ ఆసక్తికరంగా మొదలైంది. ‘మేమేంటో అంచనా లేకుండా హామీలిస్తున్నావు’ అని ప్రతినాయకుడు విసిరిన సవాల్‌కు ‘అంచనా వేయడానికి నువ్వేమైన పోలవారం డ్యామా..పట్ట్టిసీమ తూమా. పిల్లకాలువ’, ‘ఒక్క సారి డిసైడ్‌ అయ్యి బరిలో దిగితే.. బ్రేకులు లేని బుల్‌డోజర్‌ను. తొక్కి పారేస్తా’ అంటూ బాలకృష్ణ చెప్పిన డైలాగ్‌లతో ట్రైలర్‌ శక్తివంతంగా సాగింది. ఆయనపై తెరకెక్కించిన పోరాట ఘట్టాలు రొమాంచితంగా అనిపించాయి. ఈ సినిమాలో శ్రీకాంత్‌ ప్రతినాయకుడిగా కనిపిస్తున్నారు. ప్రగ్యాజైస్వాల్‌ కథానాయిక. తమన్‌ సంగీతాన్ని అందిస్తున్నారు. డిసెంబర్‌ 2న సినిమాను విడుదలచేయబోతున్నారు.