మన బిడ్డల భద్రత కోసం.!

November 4, 2021 / 01:35 AM IST

గుడ్‌టచ్‌, బ్యాడ్‌టచ్‌పై అవగాహన తప్పనిసరి
తల్లిదండ్రులు సూచనలివ్వాలి: పోలీసులు
90 శాతం కేసుల్లో నిందితులు తెలిసినవాళ్లే
పరిచయస్థులే పిల్లలను చిదిమేస్తున్నారు

బాగా తెలిసినోడే.. మన బంధువే.. వరుసకు అన్నయ్య అవుతాడు.. సొంత మామయ్యే.. అని చెప్పి పిల్లలను వాళ్లకు అప్పగిస్తున్నారా? తల్లిదండ్రులూ.. ఒక్క నిమిషం! ఎదుటి వ్యక్తిలో ఎంతటి కామం దాగుందో? ఎంతటి క్రూరత్వం ఉన్నదో? చిన్నారులను చిదిమేసే ఏ ఆలోచన చేస్తున్నారో? మీరు జాగ్రత్తగా ఉంటేనే పిల్లలు సేఫ్‌. వాళ్ల భవిష్యత్తూ సేఫ్‌.

హైదరాబాద్‌, నవంబర్‌ 3 (నమస్తే తెలంగాణ): అమ్మాయి, అబ్బాయి అన్న తేడా లేకుండా కామాంధులు చిన్నపిల్లలపై నీచానికి ఒడిగడుతున్న సంఘటనలు కోకొల్లలు. చిన్నారులపై జరుగుతున్న లైంగిక దాడుల్లో నిందితులు 90శాతం వరకు వారికి తెలిసినవారేనని గణాంకాలు చెప్తున్నాయి. వరుసకు బాబాయే, అన్నయ్యే, మామయ్యే, అత్యంత సన్నిహితుడే అని అనుకోవటం పొరపాటేనని స్పష్టం చేస్తున్నాయి. ఎదుటి వ్యక్తి స్వభావాన్ని మనం గుర్తించలేనపుడు ఏది గుడ్‌ టచ్‌, ఏది బ్యాడ్‌ టచ్‌ అన్న విషయాలు పిల్లలకు తల్లిదండ్రులు చెప్పాలని పోలీసులు సూచిస్తున్నారు. తాకకూడని శరీర భాగాలను ఎవరైనా తడిమితే భయపడకుండా ‘డోంట్‌ టచ్‌ మీ’అని గట్టిగా అరిచేలా పిల్లలకు చెప్పాలని సూచిస్తున్నారు.

తల్లిదండ్రులూ.. ఇవి గమనించండి

ఎట్టిపరిస్థితుల్లోనూ అపరిచితుల ఇంటికి పిల్లలను పంపవద్దు.
పక్కింటివారే కదా అని వదిలేయకుండా, గమనిస్తూ ఉండాలి.
ఎవరింటికైనా పిల్లలు వెళ్లి వస్తే ఆ ఇంట్లో కుటుంబసభ్యులు ఎలా ప్రవర్తించారో చిన్నారులను ఆరా తీయాలి.
పట్టణ ప్రాంతాల్లో అద్దెకు ఉండేవారైతే మరింత అప్రమత్తంగా ఉండాలి. పిల్లలను ముద్దు చేస్తున్నారు కదా అని ఇరుగుపొరుగువారిని నమ్మవద్దు.
చిన్నారులకు తప్పకుండా తల్లిదండ్రుల ఫోన్‌ నంబర్లు నోటికి నేర్పాలి, డయల్‌ 100 నంబర్‌ గురించి అవగాహన కల్పించాలి.

పిల్లలను ఒంటరిగా వదలొద్దు
ప్రస్తుత పరిస్థితుల్లో పిల్లలను ఒంటరిగా వదలటం ప్రమాదకరం. వారు బయటికి వెళ్లినా, తెలిసిన వారితో ఉన్నా తల్లిదండ్రులు ఓ కంట కనిపెడుతూ ఉండాలి. పని మీద బయటికి వెళ్లాల్సి వచ్చినా పిల్లలను వెంట తీసుకెళ్లటం మంచిది. ఎవరైనా అసభ్యంగా ప్రవర్తిస్తే వెంటనే గట్టిగా అరవటం, ఇంట్లో వచ్చి చెప్పేలా పిల్లలకు అవగాహన కల్పించాలి. చుట్టుపక్కలవారు ఎలా ప్రవర్తిస్తున్నారో పిల్లలను అడుగుతూ, గమనిస్తూ ఉండాలి.