కలంబంద.. సాగు ఎలా?

కలబంద ద్వారా ఎక్కువ లాభాలు వస్తాయని మా మిత్రుడు చెప్పాడు. నేను కూడా ఈ పంటను సాగు చేయాలని అనుకుంటున్నా. దీనికి సంబంధించిన సాగు, వాణిజ్య వివరాలు తెలుపగలరు. – రాజిరెడ్డి, మహబూబ్‌నగర్‌.

ప్రస్తుతం తక్కువ పెట్టుబడితో ఎక్కువ లాభాలు తెచ్చిపెట్టే పంటల్లో కలబంద సాగు కూడా ఒకటి. ఇది దివ్యమైన ఔషధ పంట. అందుకే, కలబందకు ప్రపంచ మార్కెట్‌లో భారీ డిమాండ్‌ ఉంది. వివిధ ఔషధాలు, పలు రకాల సబ్బులు, క్రీములు, లోషన్ల తయారీలో దీనిని విరివిగా వాడుతున్నారు. ఆరోగ్యపరంగానూ వాడకం ఎక్కువైంది.

ఇక సాగు విషయానికి వస్తే.. కలబంద సాగుకు మన వాతావరణం బాగా సరిపోతుంది. అన్ని రకాల నేలల్లోనూ పెరుగుతుంది. ఇసుక నేలలైతే అత్యంత అనుకూలం. అయితే భూగర్భ జలాలు కాస్త ఎక్కువగా ఉండే నేలను ఎంచుకోవాలి. నీటి వాడకం కూడా తక్కువే. జూలై నుంచి ఆగస్టు మధ్యలో మొక్కల్ని నాటుకోవాలి. సాగు ఖర్చు విషయానికి వస్తే.. ఇండియన్‌ కౌన్సిల్‌ ఫర్‌ అగ్రికల్చర్‌ రీసెర్చ్‌ ప్రకారం.. ఒక హెక్టార్‌ (2.4 ఎకరాలు) సాగు చేయడానికి రూ.27,500 ఖర్చు అవుతుంది. కూలీల ఖర్చు, సాగు ఏర్పాట్లు, పురుగు మందులు అన్నీ కలిపి ఏడాదికి మొత్తం ఖర్చు రూ.50 వేలు మించదు. హెక్టార్‌ పొలంలో ఏడాదికి 40 టన్నుల నుంచి 50 టన్నుల దాకా దిగుబడి వస్తుంది.

ఆయుర్వేద కంపెనీలు, కాస్మెటిక్‌, సబ్బుల తయారీ కంపెనీలు కొనుగోలు చేస్తాయి. ఆకులు మందంగా, పెద్దగా ఉంటే.. ఎక్కువ డిమాండ్‌ ఉంటుంది. అనేక సంస్థలు టన్ను ఆకులకు రూ.15 వేల నుంచి రూ.25 వేల దాకా ఇస్తున్నాయి. ఈ లెక్కన ఏడాదికి రూ.8 లక్షల నుంచి రూ.10 లక్షల దాకా ఆదాయం వస్తుంది.