Visit:
Lenin | అక్కినేని అఖిల్ కెరీర్లో ఎంతోకాలంగా ఎదురుచూస్తున్న భారీ కమర్షియల్ విజయం ఎట్టకేలకు ‘లెనిన్’ రూపంలో దక్కింది. దర్శకుడు మురళీ కిషోర్ అబ్బూరు తెరకెక్కించిన ఈ పీరియాడిక్ రూరల్ రివెంజ్ డ్రామా విడుదలైన తొలి ఆట నుంచే బ్లాక్బస్టర్ టాక్ను సొంతం చేసుకుని బాక్సాఫీస్ వద్ద అద్భుతమైన వసూళ్లతో దూసుకెళ్తోంది. హీరోయిన్గా భాగ్యశ్రీ బోర్సే నటించిన ఈ చిత్రంలో అఖిల్ నటనకు ప్రేక్షకులు, విమర్శకులు ప్రశంసలు కురిపిస్తున్నారు. విడుదలైన మొదటి రోజే రికార్డు స్థాయి ఓపెనింగ్స్ సాధించిన ‘లెనిన్’.. రెండో రోజు కూడా అదే జోరును కొనసాగించింది. అయితే అందరినీ ఆశ్చర్యపరుస్తూ మూడో రోజు మరింత భారీ వసూళ్లు సాధించడం ట్రేడ్ వర్గాలను సైతం ఆశ్చర్యానికి గురి చేసింది. ముఖ్యంగా మూడో రోజు ఎలాంటి టికెట్ ధరల పెంపు లేకుండానే తొలి రెండు రోజుల కంటే ఎక్కువ వసూళ్లు నమోదు చేయడం ఈ సినిమాకు ప్రేక్షకుల నుంచి లభిస్తున్న ఆదరణకు నిదర్శనంగా నిలిచింది.
తాజా లెక్కల ప్రకారం, ‘లెనిన్’ ప్రపంచవ్యాప్తంగా కేవలం మూడు రోజుల్లోనే రూ.61.1 కోట్లకు పైగా గ్రాస్ కలెక్షన్లు సాధించి అఖిల్ కెరీర్లోనే అత్యంత భారీ విజయంగా నిలిచింది. ఈ వసూళ్లతో అఖిల్ కెరీర్లో ఎన్నాళ్లుగానో ఎదురుచూస్తున్న కమర్షియల్ బ్రేక్ను అందుకున్నట్లైంది. సినిమా విడుదలకు ముందు ఉన్న అంచనాలను మించి ప్రదర్శన కొనసాగించడం విశేషం. ఈ విజయానికి ప్రధాన కారణంగా సినిమా కంటెంట్తో పాటు ప్రేక్షకుల నుంచి వస్తున్న బలమైన వర్డ్ ఆఫ్ మౌత్ అని ట్రేడ్ విశ్లేషకులు పేర్కొంటున్నారు. గ్రామీణ నేపథ్యం, ఎమోషనల్ కథ, యాక్షన్ ఎపిసోడ్స్, అఖిల్ నటన ప్రేక్షకులను ఆకట్టుకోవడంతో ఫ్యామిలీ ఆడియన్స్ కూడా థియేటర్లకు భారీగా తరలివస్తున్నారు.
‘లెనిన్’ చిత్రాన్ని అక్కినేని నాగార్జునతో పాటు ప్రముఖ నిర్మాత నాగ వంశీ సంయుక్తంగా నిర్మించారు. సంగీత దర్శకుడు ఎస్. థమన్ అందించిన పాటలు, నేపథ్య సంగీతం సినిమాకు మరింత బలం చేకూర్చాయి. ముఖ్యంగా యాక్షన్ సన్నివేశాలు, భావోద్వేగ ఎపిసోడ్స్లో థమన్ అందించిన బ్యాక్గ్రౌండ్ స్కోర్కు మంచి స్పందన లభిస్తోంది. ప్రస్తుతం బాక్సాఫీస్ వద్ద ఎలాంటి పోటీ లేకపోవడం, అన్ని ప్రాంతాల్లో సినిమాకు పాజిటివ్ టాక్ కొనసాగుతుండటంతో ‘లెనిన్’ వసూళ్లు మరింత పెరిగే అవకాశాలు కనిపిస్తున్నాయి. ముఖ్యంగా సోమవారం నుంచి ఇదే జోరు కొనసాగుతుందా అనే అంశంపై ట్రేడ్ వర్గాలు ఆసక్తిగా గమనిస్తున్నాయి.
