లండన్, డిసెంబర్ 20: బ్రిటన్లో ఒమిక్రాన్ వేరియంట్ అత్యంత వేగంగా విస్తరిస్తున్నది. ఆదివారం ఒక్కరోజే 12,133 కేసులు నమోదయ్యాయి. శుక్రవారం నమోదైన కేసులు 3,201తో పోలిస్తే ఇది మూడు రెట్లు కావడం గమనార్హం. కొత్తగా నమోదైన కేసులతో కలిపి ఇప్పటివరకు బ్రిటన్లో ఒమిక్రాన్ బారిన పడ్డవారి సంఖ్య 37,101కు పెరిగింది. మొత్తంగా చూస్తే బ్రిటన్లో ఆదివారం 82,886 కరోనా కేసులు నమోదు అయ్యాయి. 45 మంది చనిపోయారు. ఒమిక్రాన్ నేపథ్యంలో క్రిస్మస్ వేడుకలపై ఆంక్షలు విధించే అవకాశం ఉందని బ్రిటన్ ఆరోగ్యమంత్రి సాజిద్ జావిద్ చెప్పారు. పరిస్థితిపై ఎప్పటికప్పుడు సమీక్షిస్తున్నామని తెలిపారు. ఒమిక్రాన్ చాలా వేగంగా వ్యాపిస్తున్నదని పేర్కొన్నారు. కాగా, యూకే నుంచి వచ్చే వారిపై జర్మనీ నిబంధనలను కఠినతరం చేసింది. వ్యాక్సినేషన్తో సంబంధం లేకుండా ప్రతి ఒక్కరు 14 రోజులు క్వారంటైన్లో ఉండాలని స్పష్టం చేసింది.