హ్యాట్సాఫ్ మేడ‌మ్ ! స్పృహ కోల్పోయిన యువ‌కుడిని భుజాల‌పై మోసుకెళ్లిన మ‌హిళా సీఐ

November 11, 2021 / 07:11 PM IST

CI Rajeshwari | త‌మిళ‌నాడు రాష్ట్రాన్ని కొద్దిరోజులుగా వ‌ర్షాలు ముంచెత్తుతున్నాయి. ఎడ‌తెర‌పి లేకుండా కురుస్తున్న భారీ వ‌ర్షాల‌కు చెన్నై మ‌హాన‌గ‌రం అత‌లాకుత‌లం అవుతుంది. చాలా ప్రాంతాలు జ‌ల‌మ‌య‌మ‌య్యాయి. ర‌హ‌దారుల‌పై వ‌ర‌ద నీరు ఏరులై పారుతోంది. ఈ క్ర‌మంలో ఓ మ‌హిళా పోలీసు సాహ‌సానికి తెగించింది. భారీ వ‌ర్షాల‌కు శ్మ‌శాన వాటిక‌లో ఒక చెట్టు కూల‌డంతో స్పృహ త‌ప్పి అప‌స్మార‌క స్థితిలోకి వెళ్లిన ఓ యువ‌కుడిని కాపాడారు. ఇందుకోసం ఆ యువ‌కుడిని త‌న భుజాల‌పై మోసుకెళ్లి ఆటోలో ఆస్ప‌త్రికి త‌ర‌లించారు. స‌రైన స‌మ‌యంలో ఆస్ప‌త్రికి త‌ర‌లించి ఆ యువ‌కుడిని ప్రాణాల‌ను కాపాడారు. ఈ ఘ‌ట‌న చెన్నైలోని టీపీ ఛ‌ట్రం ఏరియాలో జ‌రిగింది. ఆమె మ‌హిళా పోలీసు.. సీఐ రాజేశ్వ‌రి. ఈ ఘ‌ట‌న‌కు సంబంధించిన వీడియో ఇప్పుడు సోష‌ల్ మీడియాలో వైర‌ల్‌గా మారింది. ఈ వీడియో చూసిన నెటిజ‌న్లు హ్యాట్సాఫ్ మేడ‌మ్‌.. అంటూ సీఐ రాజేశ్వ‌రిపై ప్ర‌శంస‌లు కురిపిస్తున్నారు.