PM Modi | వారణాసిలో భయానక పరిస్థితులు.. మోదీకి పోటీగా ఉండనివ్వట్లే!: జ్యోతిర్‌మఠ్‌ శంకరాచార్యులు

ప్రధానమంత్రి నరేంద్రమోదీకి పోటీగా బరిలో ఎవరూ ఉండకుండా కుట్రలు జరుగుతున్నాయని జ్యోతిర్‌మఠ్‌ శంకరాచార్యులు స్వామి అవిముక్తేశ్వరానంద సరస్వతి సంచలన ఆరోపణలు చేశారు.

• నామినేషన్‌ విత్‌డ్రా చేసుకోవాలని పలువురు అభ్యర్థులకు బెదిరింపులు
• జ్యోతిర్‌మఠ్‌ శంకరాచార్యులు ఆరోపణ
• వారణాసి స్థానానికి 43 నామినేషన్లు
• ఏకంగా 36 నామినేషన్ల తిరస్కరణ

PM Modi | (స్పెషల్‌ టాస్క్‌ బ్యూరో) హైదరాబాద్‌, మే 16 (నమస్తే తెలంగాణ): ప్రధానమంత్రి నరేంద్రమోదీకి పోటీగా బరిలో ఎవరూ ఉండకుండా కుట్రలు జరుగుతున్నాయని జ్యోతిర్‌మఠ్‌ శంకరాచార్యులు స్వామి అవిముక్తేశ్వరానంద సరస్వతి సంచలన ఆరోపణలు చేశారు. వారణాసి ఎంపీ స్థానానికి స్వతంత్ర అభ్యర్థులుగా దిగుదామనుకొన్న వారిని వారణాసి మేయర్‌ బెదిరిస్తున్నట్టు మండిపడ్డారు.

నామినేషన్‌ దాఖలు చేసిన వారిని భయభ్రాంతులకు గురిచేస్తున్నట్టు పేర్కొన్నారు. నామినేషన్‌ను విత్‌డ్రా చేసుకోవాలంటూ అర్ధరాత్రి పూట అభ్యర్థుల ఇండ్ల తలుపులు కొడుతున్నట్టు ధ్వజమెత్తారు. ఇవన్నీ చూస్తే, వారణాసిలో భయానక వాతావరణం కొనసాగుతున్నట్టు అర్థమవుతున్నదని వాపోయారు. అసలు దేశంలో ప్రజాస్వామ్యం కనిపించడంలేదని ఆందోళన వ్యక్తం చేశారు.

43 మందిలో.. మిగిలింది ఏడుగురే
వారణాసి ఎంపీ స్థానానికి మంగళవారంతో నామినేషన్ల గడువు ముగిసింది. మొత్తం 43 నామినేషన్లు వచ్చాయి. అయితే, వివిధ కారణాలతో 36 నామినేషన్లను ఈసీ తిరస్కరించింది. తిరస్కరించిన నామినేషన్లలో ప్రముఖ కమెడియన్‌ శ్యామ్‌ రంగీలాది కూడా ఉంది. గురువారం నాటికి ప్రధాని మోదీకి పోటీగా ఆరుగురు మాత్రమే బరిలో ఉన్నారు.