చార్లీ కిర్క్‌ భార్యతో సాన్నిహిత్యం!.. ఉషకు వాన్స్‌ విడాకులిస్తారా?

అమెరికా ఉపాధ్యక్షుడు జేడీ వాన్స్‌ మరోసారి వార్తల్లోకి ఎక్కారు. తాజాగా హత్యకు గురైన అమెరికా అధ్యక్షుడు డొనాల్డ్‌ ట్రంప్‌ సహాయకుడు చార్లీ కిర్క్‌ భార్య ఎరీకా కిర్క్‌తో సన్నిహితంగా మసలడం తీవ్ర చర్చకు దారి తీసింది.

• ఎరీకా-వాన్స్‌ ఆలింగనంతో వదంతులకు రెక్కలు

న్యూఢిల్లీ, నవంబర్‌ 1: అమెరికా ఉపాధ్యక్షుడు జేడీ వాన్స్‌ (JD Vance) మరోసారి వార్తల్లోకి ఎక్కారు. తాజాగా హత్యకు గురైన అమెరికా అధ్యక్షుడు డొనాల్డ్‌ ట్రంప్‌ సహాయకుడు చార్లీ కిర్క్‌ భార్య ఎరీకా కిర్క్‌తో సన్నిహితంగా మసలడం తీవ్ర చర్చకు దారి తీసింది. జేడీలో చార్లీని చూస్తున్నానని ఆమె చెప్పడం వాన్స్‌ వ్యక్తిగత జీవితంపై కొత్త ఊహాగానాలకు తెర తీసింది. సెప్టెంబర్‌లో యుటాలోని ఓ యూనివర్సిటీలో ప్రసంగిస్తూ సనాతనవాద కార్యకర్త చార్లీ కిర్క్‌ హత్యకు గురైన తర్వాత మొదటిసారి శుక్రవారం ప్రజల ముందుకు వచ్చిన ఎరీకా కిర్క్‌ ఉపాధ్యక్షుడు జేడీ వాన్స్‌ను పరిచయం చేస్తూ చేసిన వ్యాఖ్యలు సంచలనంగా మారాయి.

తన భర్త స్థానాన్ని ఎవరూ భర్తీ చేయలేరని, అయితే జేడీలో తన భర్త పోలికలు కొన్ని చూస్తున్నానని ఎరీకా చెప్పడం అందరినీ విస్మయానికి గురిచేసింది. అనంతరం వేదికపైకి వచ్చిన ముగ్గురు పిల్లల తండ్రి, 41 సంవత్సరాల జేడీ వాన్స్‌ని ఎరీకా గాఢంగా ఆలింగనం చేసుకున్నారు. ఎరీకా నడుంపైన వాన్స్‌ చేతులు వేయగా ఆమె తన చేతి వేళ్లను వాన్స్‌ జుత్తులోకి పోనివ్వడం, వారిద్దరూ కొన్ని క్షణాలపాటు అదే స్థితిలో ఉండడంతో ఆ ఫొటోలు సోషల్‌ మీడియాను ముంచెత్తి, నెటిజన్ల నుంచి కొత్త ఊహాగానాలకు ఆవకాశం కల్పించాయి.