NTPC : మా ప్ర‌తిష్ఠ మంట‌గ‌లిసిపోతోంది మ‌హా ప్ర‌భో.. వెంట‌నే పేరు మార్చుకోండి : ఆర్ఆర్‌బీకి ఎన్టీపీసీ లేఖ‌

NTPC : ఆర్ ఆర్‌బీ, ఎన్టీపీసీ.. ఈ రెండు ప‌దాలు కొన్ని రోజులుగా బాగా వార్త‌ల్లో నానుతున్నాయి. ఆర్ ఆర్‌బీ, ఎన్టీపీసీ ప‌రీక్ష‌ల్లో అవ‌క‌త‌వ‌క‌లు జ‌రిగాయంటూ బిహార్‌లో అభ్య‌ర్థులు పెద్ద ఎత్తున ఆందోళ‌న చేప‌ట్టారు

NTPC : ఆర్ ఆర్‌బీ, ఎన్టీపీసీ.. ఈ రెండు ప‌దాలు కొన్ని రోజులుగా బాగా వార్త‌ల్లో నానుతున్నాయి. ఆర్ ఆర్‌బీ, ఎన్టీపీసీ ప‌రీక్ష‌ల్లో అవ‌క‌త‌వ‌క‌లు జ‌రిగాయంటూ బిహార్‌లో అభ్య‌ర్థులు పెద్ద ఎత్తున ఆందోళ‌న చేప‌ట్టారు. ప‌లు రైళ్ల‌కు నిప్పు కూడా పెట్టారు. దీంతో బిహార్‌లోని కొన్ని ప్రాంతాల్లో తీవ్ర హింసాత్మ‌క వాతావ‌ర‌ణం ఏర్ప‌డిన విష‌యం విదిత‌మే. ఈ నేప‌థ్యంలోనే ఎన్టీపీసీ (ప్ర‌ముఖ విద్యుత్ ఉత్ప‌త్తి సంస్థ‌) స్పందించింది. రైల్వే బోర్డుకు ఓ లేఖ కూడా రాసింది. రైల్వేకు సంబంధించిన ఎన్టీపీసీ (నాన్ టెక్నిక‌ల్ పాపుల‌ర్ కేటగిరీ) పేరును వెంట‌నే మార్చేయాల‌ని విజ్ఞ‌ప్తి చేసింది. ఆర్ ఆర్‌బీ, ఎన్టీపీసీ ప‌రీక్ష‌ల వ‌ల్ల తెలియ‌కుండానే త‌మ సంస్థ‌కు చెడ్డ పేరువ‌స్తోంద‌ని, ప్ర‌జ‌ల్లో చుల‌క‌న భావం ఏర్ప‌డుతోంద‌ని ఎన్టీపీసీ ఆక్షేపించింది.

తెలియ‌కుండానే తాము వివాదాల సుడిగుండంలో ఇరుక్కున్నామ‌ని, మీడియాతో స‌హా చాలా మంది ఎన్టీపీసీ (నాన్ టెక్నిక‌ల్ పాపుల‌ర్ కేట‌గిరీ) ని ఎన్టీపీసీ అనే వాడేస్తున్నార‌ని, దీని వ‌ల్ల త‌మ ప్ర‌తిష్ఠ మంట‌గ‌లిసి పోతోంద‌ని ఆ లేఖ‌లో ఒకింత ఆగ్ర‌హం వ్య‌క్తం చేసింది. మీరు ఏ పోస్టుల‌కైనా ఖాళీల‌ను భ‌ర్తీ చేసే స‌మ‌యంలో మీ పూర్తి రూపాన్ని రాస్తూనే ప్ర‌క‌ట‌న ఇవ్వండి. దీని ద్వారా అటు సోష‌ల్ మీడియాలో, అటు ప‌త్రిక‌ల్లో, స‌మాజంలో త‌ప్పుడు సిగ్న‌ల్స్ వెళ్లే ఛాన్స్ ఉండ‌దు. స‌మాజంలో త‌ప్పుడు స‌మాచారాన్ని వ్యాప్తి చేయ‌వ‌ద్దు. ప‌రీక్ష పేరును మార్చ‌మ‌ని కోరుతున్నాం. భ‌విష్య‌త్తులో ఎలాంటి గంద‌ర‌గోళానికి తావివ్వొద్ద‌ని విజ్ఞ‌ప్తి చేస్తున్నాం అంటూ ఎన్టీపీసీ రైల్వే రిక్రూట్ మెంట్ బోర్డుకు లేఖ రాసింది.