IT Raids : ఓ మాజీ ఐపీఎస్ అధికారి ఇంట్లో మూడు రోజులుగా ఐటీ రైడ్స్ జరుగుతూనే వున్నాయి. ఆయన పేరు రామ్ నారాయణ్ సింగ్. నోయిడాలో వుంటున్న సింగ్ ఇంట్లోనే మూడు రోజులుగా ఐటీ అధికారులు తిష్ఠ వేసుకున్నారు. ఈ మాజీ ఐపీఎస్ అధికారి ఇంట్లో దాదాపు 600 లాకర్లున్నాయి. దీంతో మూడు రోజులుగా ఐటీ విభాగపు అధికారులు తనిఖీలు చేస్తూనే వున్నారు. ఈయన యూపీలో ప్రాసిక్యూషన్ డీజీగా బాధ్యతలు నిర్వర్తించారు. ఈ బంగ్లాలోని ప్లేస్మెంట్లోనే ఈ మాజీ ఐపీఎస్ అధికారి కుటుంబం లాకర్లను అద్దెకు ఇస్తుంటుంది. గత ఐదేళ్లుగా ఈ మాజీ ఐపీఎస్ అధికారితో సహా మరికొందరు కూడా ఈ పనిలోనే వున్నారు.
అయితే ఈ లాకర్లలో ఆ మాజీ ఐపీఎస్ డబ్బులున్నాయని తమకు సమాచారం అందిందని ఐటీ అధికారులు పేర్కొంటున్నారు. ఈ సమాచారం ఆధారంగానే తాము దాడులు చేస్తున్నామని, ఈ సందర్భంగా నేలమాళిగల్లో దాదాపు 600 లాకర్లను తాము కనుగొన్నామని ఐటీ అధికారులు పేర్కొంటున్నారు. ఇప్పటి వరకూ బినామీ పేర్లతో వున్న దాదాపు 5 లాకర్లను కట్టర్లతో కట్ చేసినట్లు సమాచారం. అలాగే 3 కోట్లను స్వాధీనం చేసుకున్నట్లు తెలుస్తోంది. ఈ లాకర్ల నిర్వహణలో కూడా కొన్ని అవకతవకలు జరిగాయని ఐటీ అధికారుల ఆరోపిస్తున్నారు.