కోల్కతా: తృణమూల్ కాంగ్రెస్ పార్టీ (TMC) కి చెందిన కీలక నాయకుడు, పశ్చిమబెంగాల్ ముఖ్యమంత్రి మమతాబెనర్జికి అత్యంత నమ్మకస్తుడు డెరెక్ ఒబ్రియన్కు కరోనా వైరస్ సోకింది. దాంతో ఆయన వెంటనే సెల్ఫ్ ఐసోలేషన్లోకి వెళ్లారు. ఈ విషయాన్ని డెరెక్ స్వయంగా తన ట్విట్టర్ అకౌంట్ ద్వారా వెల్లడించారు. ఇటీవల తనతో సన్నిహితంగా మెలిగిన వాళ్లందరూ కరోనా నిర్ధారణ పరీక్షలు చేయించుకోవాలని సూచించారు.
తాను ప్రస్తుతం క్షేమంగానే ఉన్నానని, కరోనా లక్షణాలు అంత తీవ్రంగా ఏమీ లేవని డెరెక్ ఒబ్రియన్ తెలిపారు. ఒంట్లో కొద్దిగా తేడా అనిపించడంతో తాను కరోనా పరీక్షలు చేయించుకున్నానని, ఆ పరీక్షల్లో తనకు పాజిటివ్ వచ్చిందని ఆయన చెప్పారు.