Indian Penal Code | భారత శిక్షాస్మృతి (IPC) స్థానంలో నూతన చట్టం.. లోక్‌సభలో బిల్లు

Indian Penal Code | బ్రిటిష్‌ ఇండియా సర్కారు 163 ఏళ్ల క్రితం రూపొందించిన భారత శిక్షాస్మృతి (Indian Penal Code)కి ఇక కాలం చెల్లిపోనుంది. ఇండియన్‌ పీనల్‌ కోడ్‌ను తొలగించి కేంద్ర సర్కారు దాని స్థానంలో కొత్త చట్టాన్ని తీసుకురాబోతున్నది. ఈ మేరకు ఓ బిల్లును రూపొందించి లోక్‌సభలో ప్రవేశపెట్టింది.

న్యూఢిల్లీ: బ్రిటిష్‌ ఇండియా సర్కారు 163 ఏళ్ల క్రితం రూపొందించిన భారత శిక్షాస్మృతి (Indian Penal Code)కి ఇక కాలం చెల్లిపోనుంది. ఇండియన్‌ పీనల్‌ కోడ్‌ను తొలగించి కేంద్ర సర్కారు దాని స్థానంలో కొత్త చట్టాన్ని తీసుకురాబోతున్నది. ఈ మేరకు ఓ బిల్లును రూపొందించి లోక్‌సభలో ప్రవేశపెట్టింది. అంతేగాక దానిపై సూక్ష్మ పరిశీలన కోసం బిల్లును పార్లమెంటరీ ప్యానెల్‌కు పంపనున్నట్లు కేంద్ర హోమంత్రి అమిత్‌ షా వెల్లడించారు.

ఇండియన్‌ పీనల్‌ కోడ్‌తో పాటు బ్రిటిష్‌ హయాం నాటి క్రిమినల్‌ ప్రొసీజర్‌ కోడ్ (Code of Criminal Procedure)‌, ఇండియన్‌ ఎవిడెన్స్‌ యాక్ట్‌ (Indian Evidence Act) లను కూడా కేంద్రం తొలగించనుంది. వాటి స్థానంలో కూడా కొత్త బిల్లులను రూపొందించి లోక్‌సభలో ప్రవేశపెట్టింది. ఇండియన్‌ పీనల్‌ కోడ్‌ స్థానంలో చేయబోయే కొత్త చట్టం కోసం ‘ది భారతీయ న్యాయ సంహిత – 2023’ బిల్లును తీసుకొచ్చింది.

అదేవిధంగా క్రిమినల్ ప్రొసీజర్‌ కోడ్‌ స్థానంలో కొత్త చట్టం కోసం ‘ది భారతీయ నాగరిక్‌ సురక్షా సంహిత – 2023’ బిల్లును, ఇండియన్‌ ఎవిడెన్స్‌ యాక్ట్‌ స్థానంలో కొత్త చట్టం కోసం ‘ది భారతీయ సాక్ష్య బిల్లు – 2023’ను రూపొందించింది. ఈ మూడు బిల్లులను హోంమంత్రి అమిత్‌షా శుక్రవారం లోక్‌సభలో ప్రవేశపెట్టారు. వీటన్నింటిని సూక్ష్మ పరిశీలనకై పార్లమెంటరీ ప్యానెల్‌కు పంపనున్నట్లు తెలిపారు.

ఈ పాత కాలం నాటి చట్టాలు అప్పటి బ్రిటిష్‌ ప్రభుత్వాన్ని కాపాడేవిగా, బలోపేతం చేసేవిగా ఉన్నాయని, అంతేగాక ఆ చట్టాల తుది లక్ష్యం శిక్షించడమే తప్ప న్యాయం చేయడం కాదని హోంమంత్రి పేర్కొన్నారు. అందుకే ఆ కాలం చెల్లిన చట్టాల స్థానంలో కొత్త చట్టాలు చేస్తున్నామన్నారు. కొత్త చట్టాల ద్వారా భారత పౌరులకు న్యాయం జరుగుతుందని, వారి హక్కులకు రక్షణ ఉంటుందని తెలిపారు.