కార్బన్‌ డేటింగ్‌ కచ్చితమేనా?

ఉత్తరప్రదేశ్‌ వారణాసిలోని జ్ఞానవాపి మసీదులో బయటపడిన ఓ నిర్మాణం శివలింగమని హిందూ సంఘాలు.. కాదు, ఫౌంటెన్‌ అని ఆ మసీదు నిర్వహణ కమిటీ వాదిస్తున్నాయి. ఈ నేపథ్యంలో ఆ నిర్మాణం వయస్సును నిర్ధారించేందుకు కార్బన్‌ డేటింగ్‌ నిర్వహించాలన్న ప్రతిపాదనలు వచ్చాయి.

• పురాతన నిర్మాణాల వయస్సు నిర్ధారణలో కీలకం

వారణాసి, మే 20: ఉత్తరప్రదేశ్‌ వారణాసిలోని జ్ఞానవాపి మసీదులో బయటపడిన ఓ నిర్మాణం శివలింగమని హిందూ సంఘాలు.. కాదు, ఫౌంటెన్‌ అని ఆ మసీదు నిర్వహణ కమిటీ వాదిస్తున్నాయి. ఈ నేపథ్యంలో ఆ నిర్మాణం వయస్సును నిర్ధారించేందుకు కార్బన్‌ డేటింగ్‌ నిర్వహించాలన్న ప్రతిపాదనలు వచ్చాయి. కార్బన్‌ డేటింగ్‌ ద్వారా పురాతన నిర్మాణాల వయస్సును కచ్చితంగా నిర్ధారించవచ్చా అనే అంశం ఇప్పుడు చర్చకు దారితీసింది.

40-50 వేల ఏండ్ల క్రితం నాటి ఆర్గానిక్‌ పదార్థాలు కలిగిన పురాతన వస్తువులు లేదా నిర్మాణాల వయస్సును కార్బన్‌ డేటింగ్‌ ద్వారా నిర్ధారిస్తారు. ఆ వస్తువుల్లోని రేడియో కార్బన్‌ శాతం, సి-14 అణువుల ఆధారంగా వయస్సు లెక్కిస్తారు. సంబంధిత నిర్మాణంలోని కొంతభాగాన్ని వేరుచేసి పరీక్ష నిర్వహించాల్సి ఉంటుంది. అలా కాని పక్షంలో ప్రత్యామ్నాయ పరీక్షలు చేయాలి. కార్బన్‌ డేటింగ్‌ ద్వారా వయస్సును కచ్చితంగా నిర్ధారించలేకపోయినా, దగ్గరగా అంచనా వేయవచ్చు. ఈ పరీక్ష ద్వారా పురాతన నిర్మాణాల వయస్సును వంద సంవత్సరాలు అటు ఇటుగా లెక్కించవచ్చని పురావస్తు శాస్త్రవేత్తలు చెప్తున్నారు.