Layoff | టీసీఎస్‌, ఇన్ఫోసిస్‌లోనూ ఉద్యోగాల కోతలు.. మూడు నెలల్లో 11,781 మందికి ఉద్వాసన

ఆర్థిక మాంద్యం భయాలు, వ్యయ నియంత్రణ చర్యలు వెరసి దిగ్గజ ఐటీ కంపెనీలు ఉద్యోగుల కోతను కొనసాగిస్తున్నాయి.

• టీసీఎస్‌లో 5,680, ఇన్ఫీలో 6,101 మందికి పింక్‌ స్లిప్‌
• ఆడిబుల్‌లో 5% లేఆఫ్‌
• అమెజాన్‌ కంపెనీల్లో వారంలో మూడో విడత తొలగింపులు
• సిటీ గ్రూప్‌లో రెండేండ్లలో 20 వేల మందిపై వేటు

Layoff | హైదరాబాద్‌, జనవరి 12 (స్పెషల్‌ టాస్క్‌ బ్యూరో, నమస్తే తెలంగాణ): ఆర్థిక మాంద్యం భయాలు, వ్యయ నియంత్రణ చర్యలు వెరసి దిగ్గజ ఐటీ కంపెనీలు ఉద్యోగుల కోతను కొనసాగిస్తున్నాయి. గూగుల్‌, ఫ్లిప్‌కార్ట్‌, యూనిటీ సాఫ్ట్‌వేర్‌, పేటీఎం, అమెజాన్‌ తదితర ఐటీ, ఈ-కామర్స్‌ కంపెనీలు ఇప్పటికే వందలాది మంది ఉద్యోగులను తొలగించగా ఇప్పుడు ఆ జాబితాలోకి దేశీయ ఐటీ దిగ్గజాలు టీసీఎస్‌, ఇన్ఫోసిస్‌ చేరాయి.

ప్రస్తుత ఆర్థిక సంవత్సరం మూడో త్రైమాసికంలో (అక్టోబర్‌-డిసెంబర్‌) ఈ రెండు కంపెనీలు ఏకంగా 11, 781 మంది ఉద్యోగులకు పింక్‌ స్లిప్స్‌ ఇచ్చినట్టు పారిశ్రామికవర్గాలు తెలిపాయి. ఇందులో టీసీఎస్‌ 5,680 మందిపై వేటు వేయగా, ఇన్ఫీ 6,101 మందికి ఉద్వాసన పలికింది

టీసీఎస్‌

అక్టోబర్‌-డిసెంబర్‌ మధ్య ఉద్యోగ కోతలు: 5,680

అక్టోబర్‌-డిసెంబర్‌ మధ్య వలసల రేటు: 13.3 శాతం

డిసెంబర్‌ 31నాటికి సంస్థలో మిగిలిన ఉద్యోగులు: 6,03,305

ఇన్ఫోసిస్‌

అక్టోబర్‌-డిసెంబర్‌ మధ్య ఉద్యోగ కోతలు: 6,101

అక్టోబర్‌-డిసెంబర్‌ మధ్య వలసల రేటు: 12.9 శాతం

డిసెంబర్‌ 31నాటికి సంస్థలో మిగిలిన ఉద్యోగులు: 3,22,663