అసాధారణ పరిస్థితుల్లో తప్ప బెయిల్‌ను అడ్డుకోవద్దు

ట్రయల్‌ కోర్టులు జారీ చేసిన బెయిల్‌ ఉత్తర్వులపై అసాధారణమైన పరిస్థితుల్లో తప్ప హైకోర్టులు స్టే విధించరాదని సుప్రీంకోర్టు ఆదేశించింది. హవాలా కేసులో నిందితునికి మంజూరైన బెయిల్‌పై హైకోర్టు విధించిన స్టే ఉత్తర్వులను సుప్రీంకోర్టు మంగళవారం తొలగించింది.

• హైకోర్టులకు సుప్రీంకోర్టు ఆదేశం

న్యూఢిల్లీ, జూలై 23: ట్రయల్‌ కోర్టులు జారీ చేసిన బెయిల్‌ ఉత్తర్వులపై అసాధారణమైన పరిస్థితుల్లో తప్ప హైకోర్టులు స్టే విధించరాదని సుప్రీంకోర్టు ఆదేశించింది. హవాలా కేసులో నిందితునికి మంజూరైన బెయిల్‌పై హైకోర్టు విధించిన స్టే ఉత్తర్వులను సుప్రీంకోర్టు మంగళవారం తొలగించింది. ఈ కేసుపై విచారణ జరిపిన న్యాయమూర్తులు జస్టిస్‌ అభయ్‌ ఎస్‌ ఓకా, జస్టిస్‌ అగస్టీన్‌ జార్జ్‌ మసీహ.. అసాధారణమైన పరిస్థితుల్లో మాత్రమే హైకోర్టులు బెయిల్‌పై స్టే విధించాలని పేర్కొన్నారు. ‘బెయిల్‌పై స్టే విధించే అధికారం కోర్టులకు ఉండవచ్చు. కానీ అసాధారణమైన పరిస్థితుల్లో మాత్రమే ఆ అధికారాన్ని వినియోగించాలి. సాధారణమైన పరిస్థితుల్లో బెయిల్‌ను అడ్డుకోరాదు’ అని అన్నారు. ట్రయల్‌ కోర్టు మంజూరు చేసిన బెయిల్‌పై సరైన కారణాలు తెలుపకుండానే ఢిల్లీ హైకోర్టు స్టే విధించడంపై సుప్రీంకోర్టు ఈ నెల 11న అసంతృప్తి వ్యక్తంచేసింది. గత ఏడాది జూన్‌లో మంజూరైన బెయిల్‌పై ఏడాది కాలంగా ఎందుకు స్టే విధించారని ప్రశ్నించింది. ఈ కేసులో వ్యక్తి స్వేచ్ఛను ఉల్లంఘించారంటూ సర్వోన్నత న్యాయస్థానం ఆందోళన వ్యక్తంచేసింది. ఢిల్లీ ముఖ్యమంత్రి అర్వింద్‌ కేజ్రీవాల్‌కు ట్రయల్‌ కోర్టు మంజూరుచేసిన బెయిల్‌పై ఢిల్లీ హైకోర్టు స్టే విధించిన నేపథ్యంలో సుప్రీంకోర్టు తాజాగా ఇచ్చిన తీర్పు ప్రాధాన్యం సంతరించుకుంది.