రోజుకో సూర్యుడు హాంఫట్‌!

విశ్వంలో అత్యంత వేగంగా ఎదుగుతున్న ఓ కృష్ణబిలాన్ని (బ్లాక్‌హోల్‌ను) శాస్త్రవేత్తలు కనుగొన్నారు. ఓ క్వాసర్‌ (అత్యంత ప్రకాశవంతమైన నక్షత్రం లాంటి వస్తువు) మధ్యలో ఉన్న ఈ కృష్ణబిలం ప్రతిరోజూ సూర్యుడి పరిమాణానికి సమానమైనంత పదార్ధాన్ని మింగేస్తున్నట్టు గుర్తించారు.

• విశ్వంలోనే అత్యంత ప్రకాశవంతమైన క్వాసర్‌ గుర్తింపు

న్యూఢిల్లీ, ఫిబ్రవరి 20: విశ్వంలో అత్యంత వేగంగా ఎదుగుతున్న ఓ కృష్ణబిలాన్ని (బ్లాక్‌హోల్‌ను) శాస్త్రవేత్తలు కనుగొన్నారు. ఓ క్వాసర్‌ (అత్యంత ప్రకాశవంతమైన నక్షత్రం లాంటి వస్తువు) మధ్యలో ఉన్న ఈ కృష్ణబిలం ప్రతిరోజూ సూర్యుడి పరిమాణానికి సమానమైనంత పదార్ధాన్ని మింగేస్తున్నట్టు గుర్తించారు. భూగోళానికి 1,200 కోట్ల కాంతి సంవత్సరాల దూరంలో ఉన్న ఈ క్వాసర్‌ సూర్యుని కంటే 500 లక్షల కోట్ల రెట్లు అధికంగా ప్రకాశిస్తున్నదని, విశ్వంలో అత్యంత ప్రకాశవంతమైన క్వాసర్‌ ఇదేనని ఆస్ట్రేలియా నేషనల్‌ యూనివర్సిటీ (ఏఎన్‌యూ) పరిశోధకులు వెల్లడించారు.

ఆ క్వాసర్‌లోని బ్లాక్‌హోల్‌ సూర్యుని కంటే 1,700 కోట్ల రెట్లు అధిక ద్రవ్యరాశిని కలిగి ఉన్నదని, ఇది అత్యంత వేగంగా ఎదుగుతుండటంతో తీక్షణమైన కాంతి, వేడి విడుదల అవుతున్నదని వివరించారు. సుడులు తిరుగుతున్న వాయువులు, 10 వేల డిగ్రీల సెల్సియస్‌ ఉష్ణోగ్రతలతో ఆ బ్లాక్‌హోల్‌ చుట్టుపక్కల ప్రాంతం భారీ అయస్కాంత తుపానులా కనిపిస్తున్నదని ఈ పరిశోధనకు నాయకత్వం వహించిన ఏఎన్‌యూ అసోసియేట్‌ ప్రొఫెసర్‌ క్రిస్టియన్‌ ఉల్ఫ్‌ తెలిపారు. శాస్త్రవేత్తలు తొలుత న్యూ సౌత్‌వేల్స్‌లోని ఏఎన్‌యూ సైడింగ్‌ స్ప్రింగ్‌ అబ్జర్వేటరీ వద్ద ఉన్న 2.3 మీటర్ల టెలిస్కోప్‌ సాయంతో ఈ కృష్ణబిలాన్ని గుర్తించారు. ఆ తర్వాత ఆ బ్లాక్‌హోల్‌ పూర్తి స్వభావాన్ని నిర్ధారించడంతోపాటు దాని ద్రవ్యరాశిని కొలిచేందుకు చిలీలోని యూరోపియన్‌ సదరన్‌ అబ్జర్వేటరీలో ఉన్న టెలిస్కోప్‌ను ఉపయోగించారు. ఇది ప్రపంచంలోనే అత్యంత భారీ టెలిస్కోప్‌.