Free Ration | దుర్గ్/రత్లాం, నవంబర్ 4: త్వరలో ఐదు రాష్ర్టాల అసెంబ్లీ ఎన్నికలతోపాటు లోక్సభ ఎన్నికలు జరుగనున్న నేపథ్యంలో ప్రధాని మోదీ మరో తాయిలం ప్రకటించారు. ఉచితాలకు వ్యతిరేకంటూ తరచూ ఊదరగొట్టే ప్రధాని.. ఇప్పుడు ఎన్నికల వేళ అదే ఉచిత ప్రకటన చేశారు. ఎన్నికల్లో ప్రజలను ఆకర్షించే లక్ష్యంతో ‘ఉచిత్ రేషన్’ స్కీమ్ను పొడిగించనున్నట్టు తాజాగా ప్రకటించారు.
పేదలకు మరో ఐదేండ్ల పాటు ఈ పథకాన్ని పొడిగించాలని తమ ప్రభుత్వం నిర్ణయం తీసుకొన్నదని ఛత్తీస్గఢ్, మధ్యప్రదేశ్లో శనివారం నిర్వహించిన ఎన్నికల ర్యాలీల్లో మోదీ పేర్కొన్నారు. ఛత్తీస్గఢ్లోని దుర్గ్, మధ్యప్రదేశ్లోని రత్లాంలో జరిగిన బీజేపీ ఎన్నికల ప్రచార సభలో ప్రధాని మాట్లాడారు.
ఉచిత రేషన్ పొడిగింపును ‘మోదీ గ్యారంటీ’గా ఆయన చెప్పుకొన్నారు. ఈ పథకం పొడిగింపు వల్ల పేదలకు డబ్బు ఆదా ఆవుతుందని, వాటితో వేరే అవసరాలు తీర్చుకోవచ్చని అన్నారు. దుర్గ్ ర్యాలీ సందర్భంగా ఛత్తీస్గఢ్లోని కాంగ్రెస్ ప్రభుత్వంపై మోదీ విమర్శలు గుప్పించారు. ఆ పార్టీ పేదలను పేదలుగానే ఉంచాలని అనుకుంటుందని ఆరోపించారు. మోసం తప్ప పేదలకు కాంగ్రెస్ ఏమీ ఇవ్వలేదన్నారు. ఛత్తీస్గఢ్ సీఎం భూపేశ్ బఘేల్కు బెట్టింగ్ యాప్ నిర్వాహకులతో సంబంధం, వారి నుంచి కాంగ్రెస్కు ముడుపులు అందుతున్నాయని వస్తున్న ఆరోపణలు మోదీ ప్రస్తావించారు.