Kedarnath Temple: కేదార్‌నాథ్‌లో ఫోటోలు తీయ‌డం నిషేధం.. ఉల్లంఘిస్తే క‌ఠిన చ‌ర్య‌లే

Kedarnath Temple: కేదార్‌నాథ్‌లో ఫోటోలు, వీడియోలు తీయ‌డాన్ని నిషేధించారు. ఇటీవ‌ల జ‌రిగిన ఓ సంఘ‌ట‌న నేప‌థ్యంలో.. ఆల‌య క‌మిటీ ఈ నిర్ణ‌యం తీసుకున్న‌ది. రూల్స్ ఉల్లంఘించిన‌వారిపై క‌ఠిన చ‌ర్య‌లు ఉంటాయ‌ని క‌మిటీ చెప్పింది.

రుద్ర‌ప్ర‌యాగ్‌: కేదార్‌నాథ్ ఆల‌య( Kedarnath Temple) ప‌రిసరాల్లో ఫోటోగ్ర‌ఫీని నిషేధించారు. బ‌ద్రీనాథ్‌-కేదార్‌నాథ్ ఆల‌య క‌మిటీ ఈ విష‌యాన్ని ఇవాళ ప్ర‌క‌టించింది. కేదార్‌నాథ్ ఆలయ ప‌రిసరాల్లో ఫోటోగ్ర‌ఫీ, వీడియోగ్ర‌ఫీని నిషేధిస్తున్న‌ట్లు క‌మిటీ తెలిపింది. ఆ వార్నింగ్‌కు చెందిన పోస్ట‌ర్ల‌ను ఆల‌యం వ‌ద్ద పోస్టు చేశారు. ఒక‌వేళ ఎవ‌రైనా ఫోటోలు తీయ‌డం కానీ, వీడియో రికార్డింగ్ కానీ చేస్తే, వారిపై క‌ఠిన చ‌ర్య‌లు తీసుకోనున్న‌ట్లు చెప్పారు. మొబైల్ ఫోన్ల‌తో ఆల‌య ప‌రిస‌రాల్లోకి ఎవ‌రూ ప్ర‌వేశించ‌రాదు అని, సీసీటీవీ కెమెరాల నిఘా ఎప్పుడూ ఉంటుంద‌ని పేర్కొన్నారు.

కేదార్‌నాథ్ ఆల‌యానికి వ‌చ్చే భ‌క్తులు విన‌మ్రంగా ఉండే దుస్తులు ధ‌రించాల‌ని, ఎందుకుంటే ఇటీవ‌ల కొన్ని అభ్యంత‌ర‌క‌ర‌మైన సంఘ‌ట‌న‌లు జ‌రిగాయ‌ని, అందుకే కొత్త మార్గ‌ద‌ర్శ‌కాలు జారీ చేసిన‌ట్లు బ‌ద్రీనాథ్‌-కేదార్‌నాథ్ ఆల‌య క‌మిటీ అధ్య‌క్షుడు అజ‌య్ అజేంద్ర తెలిపారు. కొంద‌రు భ‌క్తుల ప్ర‌వ‌ర్త‌న ఆమోద‌యోగ్యం లేద‌ని ఆల‌య క‌మిటీ అధ్య‌క్షుడు తెలిపారు. మార్గ‌ద‌ర్శ‌కాల‌ను క‌ఠినంగా అమలు చేసేందుకే వార్నింగ్ బోర్డుల‌ను ఏర్పాటు చేసిన‌ట్లు చెప్పారు.

ఉత్త‌రాఖండ్‌లోని కేదార్‌నాథ్ ఆల‌యం వ‌ద్ద ఇటీవ‌ల ఓ అమ్మాయి త‌న బాయ్‌ఫ్రెండ్‌కు ల‌వ్ ప్ర‌పోజ్ చేసింది. ఆ వీడియో ఒక‌టి వైల‌ర్ అయ్యింది. ఇంట‌ర్నెట్‌లో దాని గురించి తీవ్ర చ‌ర్చ కూడా సాగింది. ఈ విష‌యాన్ని తెలుసుకున్న త‌ర్వాత తాము ఈ నిర్ణ‌యం తీసుకున్న‌ట్లు ఆల‌య క‌మిటీ పేర్కొన్న‌ది. వీడియోలు, రీల్స్‌పై దృష్టి పెట్ట‌డం వ‌ల్ల మ‌త ప‌విత్ర‌త దెబ్బ‌తీనే ప్ర‌మాదం ఉంద‌ని హెచ్చ‌రించారు.