Anant Singh | ‘నితీశ్‌ కుమార్ వెళ్లిపోయారు, జేడీయూ కూడా అంతే’.. బహిష్కరణ తర్వాత అనంత్‌ సింగ్

Anant Singh | బీహార్‌లోని అధికార కూటమికి చెందిన జేడీ(యూ) నుంచి బహిష్కరణకు గురైన ఆ పార్టీ ఎమ్మెల్యే అనంత్‌ సింగ్‌ దీనిని చాలా తేలికగా తీసుకున్నారు. ‘నితీశ్‌ కుమార్ వెళ్లిపోయారు, జేడీయూ కూడా అంతే’ అని వ్యాఖ్యానించారు. ఆ పార్టీకి ఇక ఎలాంటి రాజకీయ భవిష్యత్తు లేదని ఆయన అన్నారు.

పాట్నా: బీహార్‌లోని అధికార కూటమికి చెందిన జేడీ(యూ) నుంచి బహిష్కరణకు గురైన ఆ పార్టీ ఎమ్మెల్యే అనంత్‌ సింగ్‌ దీనిని చాలా తేలికగా తీసుకున్నారు. ‘నితీశ్‌ కుమార్ వెళ్లిపోయారు, జేడీయూ కూడా అంతే’ అని వ్యాఖ్యానించారు. ఆ పార్టీకి ఇక ఎలాంటి రాజకీయ భవిష్యత్తు లేదని ఆయన అన్నారు. (Anant Singh) బీహార్ శాసనమండలి ఎన్నికల సమయంలో పార్టీ వ్యతిరేక కార్యకలాపాలకు పాల్పడ్డారనే ఆరోపణలతో ఎమ్మెల్యే అనంత్‌ సింగ్, ఆయన భార్యను జేడీ(యూ) నుంచి ఆరేళ్ల పాటు శనివారం బహిష్కరించారు. ఆ తర్వాత ఆయన మీడియాతో మాట్లాడారు. జేడీ(యూ) చర్య పట్ల తనకు ఎలాంటి విచారం లేదని తెలిపారు. ‘నితీశ్‌ కుమార్ అక్కడ లేరు. ఆ పార్టీ ఆయనదే, ఆయన వెళ్లిపోవడంతో ఆ పార్టీ కూడా ముగిసిపోయింది. కనీసం 10 స్థానాల్లో జేడీ(యూ) ఇబ్బందులను ఎదుర్కోవాల్సి వస్తుంది. ఈ చర్యకు ఎవరు ఆదేశాలిచ్చారో నాకు తెలియదు. బహుశా పార్టీని తమ ఆధీనంలోకి తీసుకున్న వారే దీనికి కారణమై ఉండవచ్చు’ అంటూ పరోక్షంగా బీజేపీని విమర్శించారు.

కాగా, తన భవిష్యత్తు రాజకీయం గురించి అనంత్‌ సింగ్‌ క్లారిటీ ఇచ్చారు. సొంత పార్టీని ఏర్పాటు చేస్తానని ఆయన తెలిపారు. ‘నితీశ్‌ కుమార్‌తో నాకు ఎలాంటి వివాదాలు లేవు. నేను ఆయనను మళ్లీ కలుస్తా. నేను ఏ పార్టీలోకి వెళ్లినా, నితీశ్‌జీని ఎప్పటికీ విమర్శించను’ అని ఆయన అన్నారు.