Cholesterol | సైలెంట్‌ కిల్లర్‌ అధిక కొలెస్ట్రాల్‌.. కంట్రోల్‌ చేసుకోకపోతే ముప్పు తప్పదు

దేశంలో అధిక కొలెస్ట్రాల్‌(డైస్లిపిడెమియా) ప్రాణాంతకంగా మారుతున్నదని, గుండెజబ్బులకు కారణమవుతున్నదని వైద్య నిపుణులు తరచూ చెప్తుంటారు.

• మొదటిసారి భారత్‌లో మార్గదర్శకాలు

Cholesterol | న్యూఢిల్లీ, జూలై 4: దేశంలో అధిక కొలెస్ట్రాల్‌(డైస్లిపిడెమియా) ప్రాణాంతకంగా మారుతున్నదని, గుండెజబ్బులకు కారణమవుతున్నదని వైద్య నిపుణులు తరచూ చెప్తుంటారు. అయితే, కొలెస్ట్రాల్‌ స్థాయిలకు సంబంధించి మాత్రం ఇప్పటివరకు భారత్‌లో నిర్దిష్టమైన మార్గదర్శకాలు లేవు. 2019లో యూరోపియన్‌ సొసైటీ ఆఫ్‌ కార్డియాలజీ ఇచ్చిన మార్గదర్శకాలనే భారత్‌లోనూ వైద్యులు పాటిస్తున్నారు. ఈ నేపథ్యంలో గురువారం భారత్‌లో మొదటిసారిగా 22 మంది సభ్యులతో కూడిన కార్డియలాజికల్‌ సొసైటీ ఆఫ్‌ ఇండియా(సీఎస్‌ఐ) కొలెస్ట్రాల్‌ స్థాయిల నిర్వహణకు సంబంధించి మార్గదర్శకాలను జారీ చేసింది.

అధిక కొలెస్ట్రాల్‌తో ముప్పు

రక్తంలో చెడు కొలెస్ట్రాల్‌(ఎల్‌డీఎల్‌), ట్రైగ్లిజెరైడ్స్‌ స్థాయిలు ఎక్కువ ఉండటం, మంచి కొలెస్ట్రాల్‌(హెచ్‌డీఎల్‌) తక్కువగా ఉండటం వల్ల గుండెజబ్బులు, స్ట్రోక్‌తో పాటు ఇతర అనారోగ్య సమస్యల ముప్పు ఉంటుంది. డైస్లిపెడెమియా ఎలాంటి లక్షణాలు లేకుండా గుండెజబ్బులకు కారణమయ్యే ‘సైలెంట్‌ కిల్లర్‌’ అని వైద్య నిపుణులు చెప్తుంటారు. చెక్కెర, కార్బోహైడ్రేట్స్‌ ఎక్కువగా ఉన్న ఆహారాలను తినడం వల్ల ఈ సమస్య ఎక్కువగా వస్తుంది. సమతుల ఆహారం, వ్యాయా మం, ఔషధాల ద్వారా కొలెస్ట్రాల్‌ స్థాయిలను అదుపులో ఉంచుకోవచ్చు.

భారతీయుల కొలెస్ట్రాల్‌పై అధ్యయనం

కేరళ ఉత్తరాది రాష్ర్టాల్లోని ప్రజల్లో ఎల్‌డీఎల్‌(చెడు కొలెస్ట్రాల్‌) స్థాయిలు అధికంగా ఉన్నట్టు గుర్తించారు. తెలంగాణ, రాజస్థాన్‌, గుజరాత్‌, మణిపూర్‌ మినహా దేశంలోని మిగతా అన్ని రాష్ర్టాల ప్రజల్లో హెచ్‌డీఎల్‌(మంచి కొలెస్ట్రాల్‌) స్థాయిలు తక్కువగా ఉన్నట్టు తేలింది.

సీఎస్‌ఐ మార్గదర్శకాలు

• సాధారణ ప్రజలు, రిస్క్‌ తక్కువగా ఉన్న వారు చెడు కొలెస్ట్రాల్‌ స్థాయిలు 100 ఎంజీ/డీఎల్‌ కంటే తక్కువ ఉండేలా చూసుకోవాలి.
• మధుమేహం, హైబీపీ సమస్యలు ఉన్న వారికి చెడు కొలెస్ట్రాల్‌ స్థాయిలు 70 ఎంజీ/డీఎల్‌ లోపు ఉండాలి.
• కార్డియోవాస్కులర్‌ డిసీజెస్‌(గుండె జబ్బులు) ముప్పు ఎక్కువగా ఉన్న వారు, ఇప్పటికే ఉన్న వారు 55 ఎంజీ/డీఎల్‌ లోపే చెడు కొలెస్ట్రాల్‌ స్థాయిలు ఉండేలా, 85 ఎంజీ/డీఎల్‌ లోపు నాన్‌-హెచ్‌డీఎల్‌ స్థాయిలు ఉండేలా చూసుకోవాలి.
• ఆహారం తీసుకున్నాక లిపిడ్‌ ప్రొఫైల్‌ పరీక్ష(కొలెస్ట్రాల్‌ స్థాయిలను తెలిపేది) చేయించుకోవడం ద్వారా సరిగ్గా ముప్పును గుర్తించవచ్చు.