రాంచీ: మతంతోపాటు పేరును దాచిన ఒక వ్యక్తి మైనర్ బాలికతో సహా ఏడుగురు మహిళలను పెళ్లి చేసుకున్నాడు. పోలీసుల కళ్లగప్పి కొన్నేళ్లుగా తప్పించుకుని తిరుగుతున్న అతడ్ని చివరకు అరెస్ట్ చేశారు. జార్ఖండ్ రాష్ట్రంలో ఈ సంఘటన జరిగింది. 50 ఏళ్ల అస్లాం ఖాన్ తన పేరును సంజయ్ కసేరా మార్చుకున్నాడు. మతాన్ని కూడా దాచి పోలీస్ డ్రెస్ వేసుకుని పోలీస్ అధికారిగా నమ్మించాడు. గత ఏడాది డిసెంబర్ 8న హిందూ మతానికి చెందిన బాలికను లోబరచుకున్నాడు. బాలిక తల్లిదండ్రులను బలవంతం చేసి ఆమెను పెళ్లి చేసుకున్నాడు. ఈ విషయం తెలిసిన పోలీసులు అక్కడకు వెళ్లగా అతడు పారిపోయాడు. దీంతో హర్లా పోలీస్ స్టేషన్లో అస్లాంపై కేసు నమోదైంది.
కాగా, దర్యాప్తు చేపట్టిన పోలీసులకు పలు షాకింగ్ విషయాలు తెలిశాయి. పోలీస్ అధికారిగా నమ్మించిన అస్లాం, పలువురి నుంచి డబ్బులు వసూలు చేశాడు. తన మతాన్ని దాచి పేరు మార్చుకుని హిందూ బాలిక, గిరిజన యువతులతో సహా ఏడుగురిని పెళ్లాడాడు. ఈ నేపథ్యంలో రాంచీ, ధన్బాద్, తోప్చాంచి, ఛాస్లలో అస్లాంపై పలు కేసులు పెండింగ్లో ఉన్నాయని డిప్యూటీ ఎస్పీ కుల్దీప్ కుమార్ తెలిపారు. ఛాస్లో నమోదైన కేసులో 2021లో అతడు జైలుకు కూడా వెళ్లినట్లు చెప్పారు. సద్దాం పేరుతో రాంచీలో అస్లాం నివసిస్తున్నట్లు పోలీసులకు తెలియడంతో అతడ్ని అరెస్ట్ చేసినట్లు వెల్లడించారు.