Fire At Oil India Tank Farm | ఆయిల్ ఇండియా సంస్థ చమురు నిల్వల వద్ద అగ్నిప్రమాదం.. ఒకరు మృతి, పలువురికి గాయాలు

Fire At Oil India Tank Farm | ఆయిల్ ఇండియా లిమిటెడ్ (వోఐఎల్‌)కు చెందిన చమురు నిల్వల వద్ద భారీ అగ్నిప్రమాదం జరిగింది. ఈ సంఘటనలో ఒక కార్మికుడు మరణించగా పలువురు గాయపడ్డారు. గాయపడిన వారిని ఆసుపత్రికి తరలించి చికిత్స అందిస్తున్నారు.

గువాహటి: ఆయిల్ ఇండియా లిమిటెడ్ (వోఐఎల్‌)కు చెందిన చమురు నిల్వల వద్ద భారీ అగ్నిప్రమాదం జరిగింది. ఈ సంఘటనలో ఒక కార్మికుడు మరణించగా పలువురు గాయపడ్డారు. గాయపడిన వారిని ఆసుపత్రికి తరలించి చికిత్స అందిస్తున్నారు. (Fire At Oil India Tank Farm) అస్సాంలోని దిబ్రూగఢ్ జిల్లాలో ఈ సంఘటన జరిగింది. టెంగాఖత్‌లోని ఆయిల్ ఇండియా లిమిటెడ్ సంస్థకు చెందిన ఇంటర్మీడియట్ ట్యాంక్ ఫార్మ్ (ఐటీఎఫ్‌)లో శుక్రవారం భారీ అగ్నిప్రమాదం జరిగింది. ఉదయం 9.30 గంటల సమయంలో కార్మికులు ఒక వాల్వ్‌ను ఆపరేట్ చేస్తుండగా ట్యాంక్ ఫార్మ్‌లోని ముడి చమురు నిల్వ విభాగంలో పేలుడు సంభవించింది. దీంతో భారీగా మంటలు ఎగసిపడ్డాయి. భయాందోళన చెందిన కార్మికులు అక్కడి నుంచి పరుగులు తీశారు.

కాగా, ఈ అగ్నిప్రమాదంలో ఒక కార్మికుడు మరణించగా మరో ఆరుగురికి కాలిన గాయాలయ్యాయి. వారిని చికిత్స కోసం దిబ్రూగఢ్‌లోని అస్సాం మెడికల్ కాలేజ్ అండ్ హాస్పిటల్, వోఐఎల్‌కు చెందిన ఆసుపత్రికి తరలించినట్లు ఆ కంపెనీ తెలిపింది. గాయపడిన కార్మికులు ఆయిల్ ఇండియా లిమిటెడ్ నియమించిన ముంబైకి చెందిన స్పెక్ట్రాన్ ఇంజినీర్స్ ప్రైవేట్ లిమిటెడ్ కంపెనీ ఉద్యోగులని పేర్కొంది.

మరోవైపు ఈ పేలుడుకు దారితీసిన కచ్చితమైన పరిస్థితులను అధికారికంగా ఇంకా ధృవీకరించలేదని ఆయిల్ ఇండియా లిమిటెడ్ తెలిపింది. తమ అగ్నిమాపక సిబ్బంది వెంటనే రంగంలోకి దిగి మంటలను అదుపుచేసినట్లు పేర్కొంది. మృతుల కుటుంబానికి సానుభూతిని ఆ సంస్థ తెలియజేసింది. అయితే ఈ అగ్నిప్రమాదంలో మరికొంత మంది కూడా గాయపడినట్లు సమాచారం. పూర్తి వివరాలు తెలియాల్సి ఉన్నది.