Narayanan Nair | ‘వయస్సు కేవలం సంఖ్య మాత్రమే’.. ఎన్నికల్లో పోటీచేస్తున్న 90 ఏళ్ల వృద్ధుడి వ్యాఖ్య

Narayanan Nair | కేరళ (Kerala) స్థానిక సంస్థల ఎన్నికల (Local body elections) లో 90 ఏళ్ల వృద్ధుడు స్వతంత్ర అభ్యర్థిగా బరిలో దిగుతున్నాడు. ఈ వయస్సులో అతడు వార్డు సభ్యుడిగా పోటీచేయడం చర్చనీయాంశమైంది.

Narayanan Nair : కేరళ (Kerala) స్థానిక సంస్థల ఎన్నికల (Local body elections) లో 90 ఏళ్ల వృద్ధుడు స్వతంత్ర అభ్యర్థిగా బరిలో దిగుతున్నాడు. ఈ వయస్సులో అతడు వార్డు సభ్యుడిగా పోటీచేయడం చర్చనీయాంశమైంది. ఈ వయస్సులో పోటీ ఎందుకు అని ప్రశ్నిస్తే.. వయస్సు అనేది కేవలం సంఖ్య మాత్రమేనని, వయస్సు దేనికీ అడ్డంకి కాదని వ్యాఖ్యానించారు.

వివరాల్లోకి వెళ్తే.. రిటైర్డ్‌ ప్రభుత్వ ఉద్యోగి అయిన నారాయణన్‌ నాయర్ వయస్సు 90 ఏళ్లు. ఆయన అశమన్నూర్‌ పంచాయతీలో రెండో వార్డు నుంచి స్వతంత్ర అభ్యర్థిగా బరిలో దిగుతున్నారు. తెల్ల చొక్కా, ధోతీ ధరించిన నారాయణన్‌ నాయర్‌ వణుకుతున్న స్వరంతోనే ఓటర్లను ఓట్లు అభ్యర్థిస్తున్నారు. ప్రధాన రాజకీయ పార్టీల అభ్యర్థులు కార్యకర్తలు, మద్దతుదారులతో ఆర్భాటంగా ప్రచారాలు నిర్వహిస్తుండగా.. నారాయణన్‌ నాయర్‌ మాత్రం ఒంటరిగా జనం దగ్గరకు వెళ్లి ఓట్లు అభ్యర్థిస్తున్నారు.

ఈ వయసులో ఎన్నికల్లో పోటీకి దిగడంపై ప్రశ్నించగా.. వయసు దేనికీ అడ్డుకాదన్నారు. అది కేవలం సంఖ్య మాత్రమే అని చెప్పారు. తాను తన వార్డు అభివృద్ధి చెందాలని కోరుకుంటున్నానని, అందుకే ఎన్నికల్లో పోటీ చేస్తున్నానని తెలిపారు. ఈ ఎన్నికల్లో తాను విజయం సాధిస్తాననే నమ్మకం తనకు ఉందని ఆయన ధీమా వ్యక్తంచేశారు. కాగా, కేరళలో రెండు దశల్లో స్థానిక ఎన్నికలు జరగనున్నాయి. డిసెంబర్‌ 9, 11 తేదీల్లో పోలింగ్‌ నిర్వహించనున్నారు. డిసెంబర్‌ 13న ఫలితాలు వెలువడనున్నాయి.