Indian Navy | చైనా విన్నపానికి స్పందించిన ఇండియన్‌ నేవీ.. రెస్క్యూ కోసం నౌకాదళ విమానం

Indian Navy | చైనా నేవీ విన్నపానికి ఇండియన్‌ నేవీ (Indian Navy) స్పందించింది. సముద్రంలో మునుగుతున్న చైనా షిప్‌లోని సిబ్బందిని కాపాడేందుకు నౌకాదళానికి చెందిన విమానాన్ని బుధవారం రంగంలోకి దించింది. రెస్క్యూ ఆపరేషన్‌లో ఎయిర్‌ ఎంఆర్‌ నిమగ్నమైనట్లు భారత నౌకాదళం గురువారం తెలిపింది.

న్యూఢిల్లీ: చైనాకు చెందిన చేపలు పట్టే నౌక హిందూ మహాసముద్రంలో మంగళవారం బోల్తాపడింది. మునుగుతున్న ఆ షిప్‌లో 39 మంది సిబ్బంది ఉన్నారు. వీరిలో 17 మంది చైనీయులు కాగా, 17 మంది ఇండోనేషియా, ఐదుగురు ఫిలిప్పిన్‌ జాతీయులు. వీరి రెస్క్యూ కోసం భారత్‌తో సహా పలు దేశాల సహాయాన్ని చైనా కోరింది. ఈ నేపథ్యంలో చైనా నేవీ విన్నపానికి ఇండియన్‌ నేవీ (Indian Navy) స్పందించింది. సముద్రంలో మునుగుతున్న చైనా షిప్‌లోని సిబ్బందిని కాపాడేందుకు నౌకాదళానికి చెందిన విమానాన్ని బుధవారం రంగంలోకి దించింది. రెస్క్యూ ఆపరేషన్‌లో ఎయిర్‌ ఎంఆర్‌ నిమగ్నమైనట్లు భారత నౌకాదళం గురువారం ట్వీట్ చేసింది. అలాగే ప్రమాదం జరిగిన సంఘటనా ప్రాంతానికి చైనా నౌకలు చేరేందుకు సహకరించినట్లు వెల్లడించింది.

కాగా, గురువారం నాటి సెర్చ్‌ ఆపరేషన్‌లో రెండు మృతదేహాలు లభించినట్లు చైనా మీడియా తెలిపింది. జాడలేని మిగతా సిబ్బంది కోసం గాలింపు చర్యలు కొనసాగుతున్నాయని పేర్కొంది. అయితే మరణించిన ఇద్దరు సిబ్బంది ఏ దేశానికి చెందినవారో అన్నది చైనా మీడియా వెల్లడించలేదు.

మరోవైపు పశ్చిమ ఆస్ట్రేలియాకు 5000 కిలోమీటర్ల దూరంలో చైనా ఫిషింగ్‌ షిప్‌ మునగడంతో సహాయం కోసం మూడు విమానాలు, నాలుగు నౌకలను ఆ దేశం పంపింది. మరిన్ని విమానాలు, నౌకలు, సిబ్బందిని పంపుతున్నట్లు ఆస్ట్రేలియన్ మారిటైమ్ సేఫ్టీ అథారిటీ (ఏఎంఎస్‌ఏ) ప్రతినిధి తెలిపారు. ఇతర దేశాల బృందాలతో కలిసి రెస్క్యూలో పాల్గొంటామని చెప్పారు.

In a swift humanitarian action on 17 May #IndianNavy deployed its Air MR assets in the Southern IOR approx 900 Nm from India, in response to sinking of a #Chinese Fishing Vessel Lu Peng Yuan Yu 028 with 39 crew onboard. The crew incl nationals from China, Indonesia & Philippines pic.twitter.com/gbcbh8DlSc

— SpokespersonNavy (@indiannavy) May 18, 2023