Woman Shot Dead In Manipur | కాల్పుల్లో మహిళ మృతి, ఇద్దరికి గాయాలు.. మణిపూర్‌లోని కాంగ్‌పోక్పి జిల్లాలో బంద్‌

Woman Shot Dead In Manipur | మణిపూర్‌లో ఇంకా హింసాత్మక సంఘటనలు కొనసాగుతున్నాయి. కాంగ్‌పోక్పి జిల్లాలోని టాఫౌ గ్రామంలో జరిగిన కాల్పుల్లో ఒక కుకీ మహిళ మరణించగా, ఇద్దరు పురుషులు గాయపడ్డారు. ఈ నేపథ్యంలో శుక్రవారం ఆ జిల్లాలో బంద్‌కు గిరిజన సంఘం పిలుపునిచ్చింది. దీంతో అక్కడ జనజీవనం స్తంభించింది.

ఇంఫాల్‌: మణిపూర్‌లో ఇంకా హింసాత్మక సంఘటనలు కొనసాగుతున్నాయి. కాంగ్‌పోక్పి జిల్లాలోని టాఫౌ గ్రామంలో జరిగిన కాల్పుల్లో ఒక కుకీ మహిళ మరణించగా, ఇద్దరు పురుషులు గాయపడ్డారు. ఈ నేపథ్యంలో శుక్రవారం ఆ జిల్లాలో బంద్‌కు గిరిజన సంఘం పిలుపునిచ్చింది. దీంతో అక్కడ జనజీవనం స్తంభించింది. (Woman Shot Dead In Manipur) గురువారం ఉదయం టాఫౌలో కాల్పులు జరుగడంతో 40 ఏళ్ల మహిళ అయిన కిమ్‌నెనెంగ్ చోంగ్లోయ్‌ మరణించింది. అదే గ్రామానికి చెందిన 34 ఏళ్ల సెహ్ంగమ్ చోంగ్లోయ్, లామ్‌ఖోచోన్ చోంగ్లోయ్‌ గాయపడ్డారు. మెరుగైన చికిత్స కోసం ఇంఫాల్‌లోని రీజినల్ ఇన్‌స్టిట్యూట్ ఆఫ్ మెడికల్ సైన్సెస్ (రిమ్స్‌)కు వారిని తరలించారు.

కాగా, సినకైతేయి ప్రాంతంలో కూడా కాల్పులు జరిగాయి. గ్రామస్తులు వరి కోత పనులు చేస్తున్న సమయంలో ఈ కాల్పులు జరిగినట్లు తెలుస్తోంది. ఒక్కసారిగా కాల్పులు మొదలవ్వడంతో రైతులు భయాందోళన చెందారు. తమ పొలాలను వదిలి ప్రాణభయంతో పారిపోయారు. గుర్తుతెలియని సాయుధ వ్యక్తులు జరిపిన దాడిలో ఒక నాగా రైతు కుడి చేతికి బుల్లెట్ గాయమైనట్లు సమాచారం. అలాగే కాల్పుల నేపథ్యంలో ప్రభావిత జాతీయ రహదారి-2లో ప్రయాణించవద్దని వాహనదారులను గ్రామస్థులు అప్రమత్తం చేశారు.

మరోవైపు కాంగ్‌పోక్పికి చెందిన ‘కమిటీ ఆన్ ట్రైబల్ యూనిటీ’ (సీవోటీయూ) ఈ కాల్పులను తీవ్రంగా ఖండించింది. సాయుధ సమూహాలు, ముఖ్యంగా టాంగ్‌ఖుల్ నేతృత్వంలోని ఎన్‌ఎస్‌సీఎన్‌-ఐఎం, జెడ్‌యూఎఫ్‌-కే వంటి సంస్థల పట్ల ప్రభుత్వం తీసుకుంటున్న చర్యలు శూన్యమని, ప్రభుత్వ నిర్లక్ష్యమే ఈ పరిస్థితికి కారణమని ఆ సంస్థ విమర్శించింది. సేనాపతి ఎస్పీ ఆధ్వర్యంలో పనిచేస్తున్న భద్రతా దళాల వైఫల్యం వల్లే కాల్పుల సంఘటనలు జరుగుతున్నాయని సీవోటీయూ కార్యవర్గ సభ్యుడు లామ్మిన్‌లున్ సింగ్‌సిట్ ఆరోపించారు. కాంగ్‌పోక్పి జిల్లాలో సేనాపతి ఎస్పీ పరిధిలో పనిచేస్తున్న భద్రతా దళాలను వెంటనే ఉపసంహరించాలని ఆ గిరిజన సంఘం డిమాండ్ చేసింది.

అలాగే నవంబర్ 12 అర్ధరాత్రి నుంచి 48 గంటల పాటు బంద్‌కు సీవోటీయూ పిలుపునిచ్చింది. ఈ నేపథ్యంలో నేషనల్ హైవే 2పై కాంగ్‌పోక్పి మీదుగా ఇంఫాల్-దిమాపూర్ మార్గంలో ప్రయాణాలను నిలిపివేశారు. ఇంఫాల్ నుంచి వస్తున్న సరుకు రవాణా లారీలు, ఇంధన ట్యాంకర్లు, ప్రయాణికుల వాహనాలను ఇంఫాల్ వెస్ట్ జిల్లాలోని కాంగ్లాటోంగ్‌బి వద్ద నిరసకారులు అడ్డుకున్నారు. రాష్ట్ర రాజధాని వైపు వస్తున్న వాహనాలను సేనాపతి జిల్లాలో నిలిపివేశారు. బస్సులు, ఆటోలు నడవకపోవడంతో ప్రయాణికులు ఇబ్బందులు పడ్డారు. మార్కెట్లు కూడా మూతపడ్డాయి. అయితే ఎలాంటి అవాంఛనీయ సంఘటనలు జరుగకుండా పోలీసులు భద్రతను కట్టుదిట్టం చేశారు.