నగ్న చిత్రానికో దేశ రహస్యం!

‘నీ ప్రతి నగ్న చిత్రానికి.. నా దేశ రహస్య యుద్ధ ప్రణాళికకు సంబంధించిన ఒక పేజీని పంపుతా’ అంటూ హనీట్రాప్‌లో చిక్కుకున్న భారత వైమానిక దళం (ఐఏఎఫ్‌) వింగ్‌ కమాండర్‌ పలు దేశ రహస్యాలను పొరుగుదేశానికి చేరవేశాడు.

• విదేశీ ఏజెంట్‌కు ఐఏఎఫ్‌ వింగ్‌ కమాండర్‌ ఆఫర్‌

న్యూఢిల్లీ: ‘నీ ప్రతి నగ్న చిత్రానికి.. నా దేశ రహస్య యుద్ధ ప్రణాళికకు సంబంధించిన ఒక పేజీని పంపుతా’ అంటూ హనీట్రాప్‌లో చిక్కుకున్న భారత వైమానిక దళం (ఐఏఎఫ్‌) వింగ్‌ కమాండర్‌ పలు దేశ రహస్యాలను పొరుగుదేశానికి చేరవేశాడు. దేశ రహస్యాలను విదేశాలకు అందిస్తున్నాడన్న అనుమానంతో దేశద్రోహం కింద ఐదు నెలల క్రితం అరెస్టయిన ఐఏఎఫ్‌ అధికారిపై పోలీసులు దాఖలు చేసిన ఎఫ్‌ఐఆర్‌లో పలు విస్తుపోయే విషయాలు వెల్లడయ్యాయి.

చార్జ్‌షీట్‌లోని వివరాల ప్రకారం.. ఆన్‌లైన్‌లో ఒక యువతి పేరిట పన్నిన వలపు వలలో చిక్కుకున్న ఆ ఐఏఎఫ్‌ వింగ్‌ కమాండర్‌ మన దేశపు ఒక రహస్య డ్రోన్‌ విభాగం బలం, నిర్మాణం, దాని కార్యాచరణ సామర్థ్యాలు, యుద్ధ పరిస్థితుల్లో మోహరింపు కోసం కేటాయించిన ప్రాంతాలు, యుద్ధ విమానాల సమాచారాన్ని పాకిస్థాన్‌కు చెందిన అనుమానిత ఏజెంట్‌కు చేరవేశాడు. జనవరి 1 నుంచి ఏప్రిల్‌ 1 వరకు ఆ వింగ్‌ కమాండర్‌ వాట్సాప్‌ సందేశాలను పరిశీలించగా పాకిస్థాన్‌ ఏజెంట్‌ నుంచి ఒక నగ్నచిత్రం అందుకున్న తర్వాత రహస్య యుద్ధ ప్రణాళికకు సంబంధించిన ఒక పేజీని అప్‌లోడ్‌ చేశాడు.

అంతేకాకుండా ప్రతి నగ్న చిత్రానికి బదులుగా ఒక యుద్ధ ప్రణాళికలోని కొత్త పేజీని అందిస్తానని వాగ్దానం చేశాడు. కంప్యూటర్‌, ఇతర పరికరాల్లో ఉన్న సున్నితమైన సమాచారాన్ని, అతడు ఇతర అధికారులతో జరిపిన రహస్య సమాచారాన్ని ఆ ఏజెంట్‌కు పలుమార్లు చేరవేశాడు. వారిద్దరి మధ్య 3,008 టెక్స్‌ మెసేజ్‌లు, నాలుగు వీడియో కాల్స్‌ జరిగాయని ఎఫ్‌ఐఆర్‌లో పేర్కొన్నారు.