Ashok Chavan: సోనియా గాంధీని క‌ల‌వ‌లేదు.. రాహుల్ గాంధీ వ్యాఖ్య‌లు నిరాధారం : అశోక్ చ‌వాన్

Ashok Chavan: కాంగ్రెస్ పార్టీని వీడ‌డానికి ముందు తానేమీ సోనియా గాంధీని క‌ల‌వ‌లేద‌ని బీజేపీ ఎంపీ అశోక్ చ‌వాన్‌ తెలిపారు. సోనియాను క‌లిసిన‌ట్లు రాహుల్ చేసిన వ్యాఖ్య‌ల‌ను ఆయ‌న త‌ప్పుప‌ట్టారు

ముంబై: కాంగ్రెస్ పార్టీని వీడ‌డానికి ముందు తానేమీ సోనియా గాంధీని క‌ల‌వ‌లేద‌ని బీజేపీ ఎంపీ అశోక్ చ‌వాన్‌(Ashok Chavan) తెలిపారు. సోనియాను క‌లిసిన‌ట్లు రాహుల్ చేసిన వ్యాఖ్య‌ల‌ను ఆయ‌న త‌ప్పుప‌ట్టారు. ఆదివారం ముంబైలో జ‌రిగిన మీటింగ్‌లో రాహుల్ మాట్లాడుతూ.. మ‌హారాష్ట్ర‌కు చెందిన ఓ నేత త‌న త‌ల్లి ముందు ఏడ్చేశాడ‌ని, ఇక ఆ శ‌క్తితో పోరాడలేన‌ని, జైలుకు వెళ్లాల‌ని లేద‌ని ఆ నేత చెప్పిన‌ట్లు రాహుల్ పేర్కొన్నారు. ఆ వ్యాఖ్య‌ల‌కు అశోక్ చ‌వాన్ కౌంట‌ర్ ఇచ్చారు. రాహుల్ గాంధీ త‌న ప్ర‌సంగంలో ఎవ‌రి పేరును ప్ర‌స్తావించ‌లేద‌ని అశోక్ చ‌వాన్‌ త‌న వీడియో సందేశంలో తెలిపారు. ఒక‌వేళ త‌న పేరును ప్ర‌స్తావిస్తే, అప్పుడు ఆ వ్యాఖ్య‌లు అర్థ‌ర‌హితం, నిరాధార‌మ‌ని అన్నారు. కాంగ్రెస్ పార్టీకి రాజీనామా చేసే వ‌ర‌కు తాను పార్టీ ప్ర‌ధాన కార్యాల‌యంలో ప‌నిచేసిన‌ట్లు చెప్పారు. ముందుగా ఎమ్మెల్యే పోస్టుకు రాజీనామాచేసి ఆ త‌ర్వాత పార్టీకి కూడా రిజైన్ చేసిన‌ట్లు తెలిపారు. త‌న రాజీనామా గురించి చివ‌రి నిమిషం వ‌ర‌కు ఎవ‌రికీ తెలియ‌ద‌ని మాజీ సీఎం అన్నారు. తానెప్పుడూ సోనియా గాంధీని క‌ల‌వ‌లేద‌న్నారు. ఎన్నిక‌ల వేళ రాహుల్ రాజ‌కీయ వ్యాఖ్య‌లు చేసిన‌ట్లు గుర్తు చేశారు. కాంగ్రెస్‌ను వీడిన త‌ర్వాత అశోక్ చ‌వాన్‌ బీజేపీలో చేరారు. ఆ పార్టీ ఆయ‌న్ను రాజ్య‌స‌భ‌కు నామినేట్ చేసింది.