డ్రగ్స్‌ అడ్డాగా గుజరాత్‌

బీజేపీ పాలిత గుజరాత్‌లో మద్యం, వ్యభిచారం, డ్రగ్స్‌ అమ్మకాలు, జూద కార్యక్రమాలు ఎక్కడబడితే అక్కడ యథేచ్ఛగా కొనసాగుతున్నాయని కాంగ్రెస్‌ ఎమ్మెల్యే జిఘ్ణేశ్‌ మెవానీ శనివారం ఆరోపించారు.

• విచ్చలవిడిగా మద్యం, వ్యభిచారం
• దీనిపై అసెంబ్లీలో చర్చించాలి కాంగ్రెస్‌ పార్టీ డిమాండ్‌

అహ్మదాబాద్‌, నవంబర్‌ 29: బీజేపీ పాలిత గుజరాత్‌లో మద్యం, వ్యభిచారం, డ్రగ్స్‌ అమ్మకాలు, జూద కార్యక్రమాలు ఎక్కడబడితే అక్కడ యథేచ్ఛగా కొనసాగుతున్నాయని కాంగ్రెస్‌ ఎమ్మెల్యే జిఘ్ణేశ్‌ మెవానీ శనివారం ఆరోపించారు. ప్రస్తుతం రాష్ట్రం డ్రగ్స్‌ అడ్డాగా మారిందని, నార్కోటిక్‌ డ్రగ్స్‌ తయారీకి అవసరమైన ముడి పదార్ధాలను రాష్ట్రంలోనే వివిధ కంపెనీలలో తయారు చేస్తున్నారని ఆయన విమర్శించారు. దీనిపై చర్చించడానికి అసెంబ్లీని ప్రత్యేకంగా సమావేశపర్చాలని ఆయన డిమాండ్‌ చేశారు. మద్యం, డ్రగ్స్‌, వ్యభిచార, జూద కేంద్రాలు రాష్ట్రంలోని 33 జిల్లాల్లో 250 తాలుకాల్లో ఉన్నాయని ఆయన తెలిపారు.

‘ఇటీవల రూ.64 వేల కోట్ల విలువైన డ్రగ్స్‌ను గుజరాత్‌ కోస్తా తీరంలో పట్టుకున్నారు. వాటిని సరఫరా చేసేది ఎవరు? వాటిని అందుకునేదెవరు? దీనిపై పోలీసులు, అధికారులు ఏమని చెబుతారు’ అని ఆయన ప్రశ్నించారు. ఈ చట్టవిరుద్ధ కార్యకలాపాలన్నీ పోలీసులు, ప్రభుత్వ ఆశీస్సులు లేకుండా కొనసాగుతున్నాయా? అని ఆయన నిలదీసాశారు. అందుకే రాష్ర్టానికి పెను సమస్యగా మారిన నార్కోటిక్‌ డ్రగ్స్‌పై చర్చించేందుకు అసెంబ్లీ ప్రత్యేక సమావేశాన్ని నిర్వహించాలని, ఇటీవల సీజ్‌ చేసిన డ్రగ్స్‌కు సంబంధించిన వాస్తవ వివరాలను సభకు వెల్లడించాలని ఆయన డిమాండ్‌ చేశారు. నిషేధం అమలులో ఉన్న గుజరాత్‌లో ప్రతి గల్లీలోనూ మద్యాన్ని విచ్చలవిడిగా బహిరంగంగా అమ్మడం సిగ్గు చేటని ఆయన విమర్శించారు.