Morbi bridge collapse: మోర్బీ బ్రిడ్జ్ బాధితుల‌కు 10 ల‌క్ష‌ల న‌ష్ట‌ప‌రిహారం: గుజ‌రాత్ హైకోర్టు ఆదేశం

Morbi bridge collapse:మోర్బీ బ్రిడ్జ్ బాధితుల‌కు 10 ల‌క్ష‌ల న‌ష్ట‌ప‌రిహారం ఇవ్వాల‌ని గుజ‌రాత్ హైకోర్టు ఆదేశించింది. బ్రిడ్జ్ కూలిన ఘ‌ట‌న‌లో 135 మంది మ‌ర‌ణించిన విష‌యం తెలిసిందే.

అహ్మ‌దాబాద్‌: గుజ‌రాత్‌లో గ‌త ఏడాది మోర్బీ బ్రిడ్జ్ (Morbi Bridge)కూలిన ఘ‌ట‌న‌లో మ‌ర‌ణించిన‌వారి కుటుంబాల‌కు ఒక్కొక్కరికి 10 ల‌క్ష‌లు చెల్లించాల‌ని ఒరేవా గ్రూపు(Oreva Group)న‌కు ఇవాళ గుజ‌రాత్ హైకోర్టు (Gujarat High Court)ఆదేశాలు జారీ చేసింది. ఆ ఘ‌ట‌న‌లో గాయ‌ప‌డ్డ‌వారికి ఒక్కొక్క‌రికి రెండు ల‌క్ష‌లు ఇవ్వాల‌ని కోర్టు పేర్కొన్న‌ది. ఒరేవాగ్రూపున‌కు చెందిన అజంతా మాన్యుఫ్యాక్చ‌రింగ్ లిమిటెడ్ సంస్థ ఆ బ్రిడ్జ్‌ను మెయిన్‌టేన్ చేస్తున్న‌ది.

బ్రిటీష్ కాలంలో మ‌చ్చూ న‌దిపై నిర్మించిన ఆ స‌స్పెన్ష‌న్ బ్రిడ్జ్ గ‌త ఏడాది అక్టోబ‌ర్ 30వ తేదీన కూలిన విష‌యం తెలిసిందే. చీఫ్ జ‌స్టిస్ సోనియా గోకాని, జ‌స్టిస్ సందీప్ భ‌ట్‌ల‌తో కూడిన ధ‌ర్మాస‌నం ఈ ఆదేశాలు జారీ చేసింది. బ్రిడ్జ్ మెయింటేనెన్స్‌లో లోపాలు ఉన్నాయ‌ని, స‌రైన స‌మ‌యంలో రిపేర్లు చేయ‌లేద‌ని ఆ ఘ‌ట‌న‌పై ద‌ర్యాప్తు చేప‌ట్టిన సిట్ త‌న రిపోర్టులో పేర్కొన్న‌ది.

మోర్బీ బ్రిడ్జ్ కూలిన ఘ‌ట‌న‌లో సుమారు 135 మంది మ‌ర‌ణించారు. ఒరేవా గ్రూపు మేనేజింగ్ డైరెక్ట‌ర్ జ‌య్‌సుఖ్ ప‌టేల్‌ను జ‌న‌వ‌రి 31వ తేదీన అరెస్టు చేశారు. గుజ‌రాత్‌లోని కోర్టు ముందు ఆయ‌న స‌రెండ‌ర్ అయ్యారు.