Visit:
Google | గూగుల్ (Google).. ఈ పేరు తెలియని వారు ఉండరు. చిన్న పిల్లల నుంచి వృద్ధుల వరకూ అందరికీ ఈ గూగుల్ సుపరిచితమే. ఒకప్పుడు ఏదైనా సమాచారం కావాలంటే పేపర్లలోనో.. పుస్తకాల్లోనో వెతికేవాళ్లం. కానీ ఇప్పుడు ఏ సమాచారం కావాలన్నా క్షణాల్లో అరచేతిలో ప్రత్యక్షమవుతున్నది. దానికి కారణం గూగుల్. సినిమా, స్పోర్ట్స్‌, పాలిటిక్స్‌ ఇలా ఒకటేంటి సకలం ఇందులో లభిస్తాయి. అంతటి ప్రాముఖ్యత కలిగింది గూగుల్. ఒక్కమాటలో చెప్పాలంటే ప్రతి ఒక్కరి జీవితంలో గూగుల్ భాగమైపోయింది. ఇంతకీ ఇదంతా ఎందుకు అని అనుకుంటున్నారా..? ఏమీ లేదండీ.. గూగుల్ సెర్చింజన్‌ అందుబాటులోకి వచ్చి నేటికి 27 ఏండ్లు పూర్తయ్యింది (Google Birthday). ఈ సందర్భంగా గూగుల్ మొట్టమొదటి లోగోతో ప్రత్యేక డూడుల్‌ను రూపొందించింది.
1998 సెప్టెంబర్ 4వ తేదీన గూగుల్ ఆవిర్భవించింది. స్టాన్‌ఫోర్డ్‌ యూనివర్సిటీలో చదువుతున్న సమయంలో లారీ పేజ్, సెర్గే బ్రిన్ దీన్ని ప్రారంభించారు. గూగుల్ మొదటి ఏడేళ్లు సెప్టెంబర్ 4నే వార్షికోత్సవం నిర్వహించింది. కానీ, రికార్డుల ఆధారంగా 2005 నుంచి సెప్టెంబర్ 27కి మార్చింది. క్రమక్రమంగా అభివృద్ధి చెందుతూ వచ్చిన ఈ అమెరికన్‌ సంస్థ.. నేడు వరల్డ్‌ టాప్‌ కంపెనీల్లో ఒకటిగా నిలిచింది. గూగుల్‌లో రోజూ ప్రపంచ వ్యాప్తంగా వందకు పైగా భాషల్లో మిలియన్ల కొద్దీ శోధనలు జరుగుతున్నాయి.
లారీ పేజ్, సెర్గీ బ్రిన్ తాము రూపొందించిన ఇంటర్నెట్‌ సెర్చ్‌ ఇంజిన్‌కు గూగోల్ (Googol) అనే పేరు పెట్టాలనుకున్నారు. గూగోల్ అంటే.. 1 పక్కన 100 సున్నాలు ఉండే సంఖ్య. అపారమైన సమాచారాన్ని అందిస్తుంది అనే అర్థం వచ్చేలా ఆ పదం అనుకున్నారు. అయితే.. స్టాన్‌ఫోర్డ్‌ యూనివర్సిటీలో వీళ్లద్దరి సహచరి విద్యార్థి ఒకరు Googolకి బదులు గూగుల్ అని తప్పుగా ఉచ్ఛారించారు. అయితే లారీ పేజ్‌కు ఆ పేరు నచ్చడంతో క్షణాల్లో Google.comగా మార్చేశారు.
ఈ 27 ఏళ్లలో గూగుల్ అనేక రంగాల్లో విస్తరించింది. సెర్చ్‌తో పాటు యూట్యూబ్‌, ఆండ్రాయిడ్‌, ప్రకటనలు, క్లౌడ్‌ సేవలు, స్మార్ట్‌ డివైజెస్‌, కృత్రిమ మేధస్సు తదితర రంగాల్లో విస్తరించింది. ఇక ఈ సంస్థకు భారత్‌కు చెందిన సుందర్‌ పిచాయ్‌ సీఈఓగా నియమితులైన విషయం తెలిసిందే. ఆయన ఆధ్వర్యంలో కంపెనీ కొత్త పుంతలు తొక్కుతూ మరింతగా ముందుకు దూసుకెళ్తోంది.
Also Read..
Petal Gahlot | ఐరాస వేదికగా పాక్‌ ప్రధానికి గట్టిగా బదులిచ్చిన పేటల్‌ గహ్లోత్‌.. ఇంతకీ ఎవరీమె..?
