Ballot Paper | మళ్లీ పేపర్‌ బ్యాలెట్‌కు మళ్లాలి.. ఈవీఎంలను రద్దు చేయాలి

ఈవీఎంల హ్యాకింగ్‌ ఆరోపణల నేపథ్యంలో ఎన్నికలను తిరిగి పేపర్‌ బ్యాలెట్‌ పద్ధతిలో నిర్వహించాలనే డిమాండ్‌ పెరుగుతున్నది. ఈవీఎంల స్థానంలో తిరిగి బ్యాలెట్‌ పేపర్లను తీసుకురావాలని పలు పార్టీలకు చెందిన నేతలు డిమాండ్‌ చేస్తున్నారు.

• హ్యాకింగ్‌ ఆరోపణలతో రాజకీయ వర్గాల్లో పెరుగుతున్న డిమాండ్‌

న్యూఢిల్లీ, జూన్‌ 18: ఈవీఎంల హ్యాకింగ్‌ ఆరోపణల నేపథ్యంలో ఎన్నికలను తిరిగి పేపర్‌ బ్యాలెట్‌ పద్ధతిలో నిర్వహించాలనే డిమాండ్‌ పెరుగుతున్నది. ఈవీఎంల స్థానంలో తిరిగి బ్యాలెట్‌ పేపర్లను తీసుకురావాలని పలు పార్టీలకు చెందిన నేతలు డిమాండ్‌ చేస్తున్నారు. తాజాగా ఆంధ్రప్రదేశ్‌ మాజీ సీఎం, వైసీపీ అధినేత వైఎస్‌ జగన్మోహన్‌రెడ్డి మంగళవారం ఎక్స్‌ వేదికగా ఈవీఎంలకు వ్యతిరేకంగా అభిప్రాయం వ్యక్తం చేశారు. పేపర్‌ బ్యాలెట్‌ పద్ధతిలో ఎన్నికలు నిర్వహిస్తేనే ప్రజాస్వామ్య నిజమైన స్ఫూర్తి నిలబడుతుందని అన్నారు.

కర్ణాటకలో బీజేపీ-జేడీఎస్‌ కూటమి అధిక ఎంపీ స్థానాలు గెలుచుకోవడంలో ఈవీఎంల పాత్ర ఉన్నదని డిప్యూటీ సీఎం డీకే శివకుమార్‌ ఆరోపించారు. బ్యాలెట్‌ పేపర్‌ పద్ధతిలో ఎన్నికల నిర్వహణకు కేంద్ర ప్రభుత్వం ఎందుకు విముఖత వ్యక్తం చేస్తున్నదని మహారాష్ట్ర కాంగ్రెస్‌ అధ్యక్షుడు నానా పటోలే ప్రశ్నించారు. ఎన్నికలు పారదర్శకంగా జరుగతాయనే దానిపై ఈసీ ప్రజలకు హామీ ఇవ్వాలని శివసేన(యూబీటీ) ఎంపీ ప్రియాంక చతుర్వేది అన్నారు.