పటాన్చెరు, నవంబర్ 15: కాంగ్రెస్ పార్టీ కి టీపీసీసీ ఉపాధ్యక్షుడు గాలి అనిల్కుమార్ రాజీనామా చేశారు. రాజీనామా లేఖను ఏఐసీసీ అధ్యక్షుడు మల్లికార్జున ఖర్గేకు పంపినట్టు తెలిపారు. ఈ మేరకు బుధవారం సంగారెడ్డి జిల్లా అశోక్నగర్లో ఏర్పాటు చేసిన మీడియా సమవేశంలో ఆయ న వివరాలు వెల్లడించారు. కాంగ్రెస్ పార్టీ రాష్ట్ర నేతల తీరుతో మనస్తాపం చెంది పార్టీకి రాజీనామా చేస్తున్నానని చెప్పారు. పార్టీ కోసం ఎన్నో త్యాగాలు చేశానని, ఖర్చుకు వెనుకాడకుండా పని చేశానని ఆవేదన వ్యక్తం చేశారు. పార్టీ బలోపేతానికి కష్టపడ్డ వారిని కాదని.. టికెట్ కావాలని దరఖాస్తు చేసుకోని వారికి కూడా బీ ఫాం ఇవ్వడం అన్యాయమని చెప్పారు. కాంగ్రెస్లో కష్టపడిన వారికి న్యాయం లేదని విమర్శించారు. కార్యకర్తలు, అభిమానుల ఒత్తిడి మేరకు కాంగ్రెస్ పార్టీ ప్రాథమిక సభ్యత్యానికి, పార్టీ పదవులన్నింటికీ రాజీనామా చేశానని గాలి అనిల్కుమార్ స్పష్టం చేశారు. తనతోపాటు పెద్దసంఖ్యలో అభిమానులు, కాంగ్రెస్ పార్టీ నాయకులు, కార్యకర్తలు కాంగ్రెస్ను వీడుతారని ఆసక్తి రేకెత్తించారు. తన అనుచరులతో చర్చించి త్వరలోనే భవిష్యత్తు కార్యాచరణను ప్రకటిస్తానని చెప్పారు.