బెంగళూరు: ఒక మహిళ బుక్ చేసిన క్యాబ్కు బదులు పొరపాటున మరో క్యాబ్ ఎక్కింది. ఈ నేపథ్యంలో ఆగ్రహించిన ఉబర్ క్యాబ్ డ్రైవర్ ఆ మహిళతోపాటు ఆమె కుమారుడిపై దాడి చేశాడు (Uber driver attacks woman). ఫిర్యాదు అందుకున్న పోలీసులు ఆ డ్రైవర్ను అరెస్ట్ చేశారు. కర్ణాటక రాజధాని బెంగళూరులో ఈ సంఘటన జరిగింది. బుధవారం భోగనహళ్లి ప్రాంతానికి చెందిన 48 ఏండ్ల మహిళ తన కుమారుడ్ని ఆసుపత్రికి తీసుకెళ్లేందుకు క్యాబ్ బుక్ చేసింది. వారి ఇంటి వద్దకు ఒక క్యాబ్ వచ్చింది. బుక్ చేసుకున్న క్యాబ్గా భావించిన ఆ మహిళ తన కుమారుడితో కలిసి అందులోకి ఎక్కింది. అయితే బుక్ చేసిన క్యాబ్ అది కాదని ఆమె తెలుసుకున్నది.
కాగా, కుమారుడు ముందుగా కారు దిగాడు. ఆ తర్వాత ఆ మహిళ కూడా కారు దిగేందుకు ప్రయత్నించింది. ఇంతలో ఉబర్ క్యాబ్ డ్రైవర్ ఆ మహిళతో ఘర్షణకు దిగాడు. అంతేగాక ఆమెను పలుసార్లు కొట్టాడు. అడ్డుకునేందుకు ప్రయత్నించిన ఆమె కుమారుడిపైనా దాడి చేశాడు.
మరోవైపు స్థానికులు, పొరుగువారు వెంటనే స్పందించారు. ఉబర్ క్యాబ్ డ్రైవర్ దాడిని అడ్డుకున్నారు. కారులో పారిపోయేందుకు ప్రయత్నించిన అతడ్ని మెయిన్ గేటు వద్ద నిలువరించారు. మహిళ భర్త వెంటనే పోలీసులకు ఫిర్యాదు చేశాడు. ఈ నేపథ్యంలో 25 ఏండ్ల ఉబర్ క్యాబ్ డ్రైవర్ బసవరాజును పోలీసులు అరెస్ట్ చేశారు.
అయితే ఆ మహిళ తన పట్ల అమర్యాదగా ప్రవర్తించిందని క్యాబ్ డ్రైవర్ ఆరోపించాడు. మరోవైపు ఆ ప్రాంతంలో ఉన్న సీసీటీవీలో రికార్డైన ఈ సంఘటనకు సంబంధించిన వీడియో క్లిప్ సోషల్ మీడియాలో వైరల్ అయ్యింది.