ఢిల్లీ హైకోర్డు డివిజన్ బెంచ్ భిన్నమైన తీర్పు
సుప్రీంకోర్టుకు వెళ్లాలని పిటిషనర్లకు సూచన
న్యూఢిల్లీ, మే 11: ఐపీసీ-375 సెక్షన్ కింద రేప్ నిర్వచనం నుంచి మారిటల్ రేప్ను( భార్యకు ఇష్టంలేని శృంగారం) మినహాయించడంలో రాజ్యాంగబద్ధతను ప్రశ్నిస్తూ దాఖలైన పిటిషన్లపై ఢిల్లీ హైకోర్టు డివిజన్ బెంచ్లో జడ్జీలు పరస్పరం భిన్నమైన తీర్పునిచ్చారు. మారిటల్ రేప్ కూడా లైంగిక దాడే అని, శిక్షార్హమైనదేనని ఒక జడ్జి తీర్పునివ్వగా, మారిటల్ రేప్ను నేరంగా పరిగణించకపోవడం రాజ్యాంగ విరుద్ధమైనదేమీ కాదని మరో జడ్జి తీర్పునిచ్చారు. ఈ అంశంపై సుప్రీం కోర్టుకు వెళ్లాలని ఇద్దరు న్యాయమూర్తులు పిటిషనర్లకు సూచించారు.
డివిజన్ బెంచ్కు నేతృత్వం వహించిన జస్టిస్ రాజీవ్ షక్దేర్.. ‘మారిటల్ రేప్కు ఉన్న మినహాయింపును తొలగించాలి. ఇది శిక్షార్హమైనది. స్వేచ్ఛ, జీవించే హక్కును ఇది హరిస్తున్నది’ అని తీర్పునిచ్చారు. దీనికి భిన్నంగా మరో జడ్జి జస్టిస్ హరిశంకర్ ‘మారిటల్ రేప్కు మినహాయింపు ఇవ్వడం రాజ్యాంగ విరుద్ధమైనదేమీ కాదు’ అని పేర్కొన్నారు. ‘మారిటల్ రేప్ను నేరంగా పరిగణించలేం. అలా చేస్తే వివాహ వ్యవస్థ అస్థిరత్వానికి లోనవుతుంది’ అని కేంద్రం 2017లో ఢిల్లీ హైకోర్టుకు అఫిడవిట్ సమర్పించింది.