జైల్లోనే కేజ్రీవాల్‌ను చంపేందుకు బీజేపీ కుట్ర

కేంద్రంలోని బీజేపీ ప్రభుత్వంపై ఆమ్‌ ఆద్మీ పార్టీ తీవ్ర ఆరోపణలు చేసింది. ఢిల్లీ మద్యం పాలసీ కేసులో తీహార్‌ జైలులో ఉన్న ముఖ్యమంత్రి కేజ్రీవాల్‌ను అక్కడే చంపించడానికి కుట్ర జరుగుతున్నదని పేర్కొంది.

• ఆప్‌ ఎంపీ సంజయ్‌ సింగ్‌ ఆరోపణ

న్యూఢిల్లీ, జూలై 21: కేంద్రంలోని బీజేపీ ప్రభుత్వంపై ఆమ్‌ ఆద్మీ పార్టీ తీవ్ర ఆరోపణలు చేసింది. ఢిల్లీ మద్యం పాలసీ కేసులో తీహార్‌ జైలులో ఉన్న ముఖ్యమంత్రి కేజ్రీవాల్‌ను అక్కడే చంపించడానికి కుట్ర జరుగుతున్నదని పేర్కొంది. ఈ సందర్భంగా జూన్‌ 3 నుంచి జూలై 7 వరకు 26 సార్లు కేజ్రీవాల్‌ చక్కెర స్థాయిలు పడిపోయిన మెడికల్‌ రిపోర్టులను ప్రదర్శించింది. ఆదివారం ఆప్‌ రాజ్యసభ ఎంపీ సంజయ్‌ సింగ్‌ మీడియాతో మాట్లాడుతూ జైలులో కేజ్రీవాల్‌ ఆరోగ్యం క్షీణిస్తున్నా బీజేపీ నుంచి ఎలాంటి స్పందనా లేదని, కేంద్రంలోని మోదీ, ఢిల్లీ లెఫ్ట్‌నెంట్‌ గవర్నర్‌ వీకే సక్సేనా కేజ్రీవాల్‌ జీవితంతో ఆటలాడుకుంటున్నారని ఆరోపించారు. కేజ్రీ ఆరోగ్యంపై సక్సేనా, బీజేపీ ప్రభుత్వం తప్పుడు రిపోర్టులు విడుదల చేస్తూ అసత్య ప్రకటనలు చేస్తున్నారని ఆయన మండిపడ్డారు.