Raghav Chadha | సిసోడియా జైలు బయటికి రావడం కేంద్ర దర్యాప్తు సంస్థలకు ఇష్టం లేదు: ఆప్‌

Manish Sisodia | ఢిల్లీ డిప్యూటీ సీఎం మనీష్‌ సిసోడియాపై ఎన్‌ఫోర్స్‌మెంట్‌ డైరెక్టరేట్‌ మరో కేసు నమోదు చేయడంపై ఆమ్‌ ఆద్మీ పార్టీ ఆగ్రహం వ్యక్తం చేసింది. సిసోడియా జైలు నుంచి బయటికి రావడం కేంద్ర దర్యాప్తు సంస్థలకు ఇష్టం లేదని మండిపడింది.

న్యూఢిల్లీ: ఢిల్లీ డిప్యూటీ సీఎం మనీష్‌ సిసోడియాపై ఎన్‌ఫోర్స్‌మెంట్‌ డైరెక్టరేట్‌ మరో కేసు నమోదు చేయడంపై ఆమ్‌ ఆద్మీ పార్టీ ఆగ్రహం వ్యక్తం చేసింది. సిసోడియా జైలు నుంచి బయటికి రావడం కేంద్ర దర్యాప్తు సంస్థలకు ఇష్టం లేదని మండిపడింది. కేంద్ర దర్యాప్తు సంస్థలు సిసోడియాపై మరో తప్పుడు కేసు బనాయించాయని, ఆయన జైలు నుంచి బయటికి రావడం వారికి ఇష్టం లేదని ఆమ్‌ ఆద్మీ పార్టీ అధికార ప్రతినిధి, రాజ్యసభ సభ్యుడు రాఘవ్‌ చద్దా వ్యాఖ్యానించారు.

‘ఫీడ్‌ బ్యాక్‌ యూనిట్‌ పేరుతో మనీష్‌ సిసోడియాపై మరో తప్పుడు కేసు నమోదు చేశారు. ప్రధానిపై సిసోడియా గూఢరచర్యానికి పాల్పడ్డాడని వారు ఆరోపిస్తున్నారు. ఎందుకంటే ప్రధాని మోదీ, సిసోడియా ఇద్దరిలో ఎవరు శక్తిమంతులో కేంద్ర దర్యాప్తు సంస్థలకు తెలియదు. అందుకే ఎనిమిదేండ్లుగా గూఢచర్యం కొనసాగుతున్నదని ఆరోపిస్తున్నారు’ అని రాఘవ్ చద్దా ఎద్దేవా చేశారు. మరి ఎనిమిదేండ్లుగా ప్రధానిపై గూఢచర్యం కొనసాగుతుంటే కేంద్ర దర్యాప్తు సంస్థలు ఏం చేస్తున్నట్టని ఆయన ప్రశ్నించారు.